مصری وزیر خارجہ دا دورہ پاکستان، سِول و عسکری قیادت نال ملاقاتاں، علاقائی امن اَتے مشترکہ خوشحالی کیتے کم کرݨ دا عزم

اسلام آباد۔ 30 نومبر (اے پی پی) نائب وزیراعظم و وزیر خارجہ سینیٹر محمد اسحاق ڈار دی دعوت تے مصر دے وزیر خارجہ ڈاکٹر بدر احمد محمد عبدالعاطی 29 توں 30 نومبر 2025 تئیں پاکستان دا سرکاری دورہ کیتا اَتے سِول و عسکری قیادت نال ملاقاتاں کیتیاں۔ ݙوہیں فریقاں سیاسی، اقتصادی، تجارتی اَتے دفاعی تعلقات، ثقافتی اَتے تعلیمی تعاون اَتے صحت دے شعبے اچ اشتراک سودھے پاکستان-مصر ݙو طرفہ تعلقات دے سارے پہلواں دا جائزہ ڳھِدا۔ترجمان دفتر خارجہ موجب ، مصر دے وزیر خارجہ وزارت خارجہ اچ نائب وزیراعظم اسحاق ڈار نال وفد دی سطح تے ڳالھ مہاڑ کیتی۔ ݙوہیں ملکاں ہیپاٹائٹس سی دے خاتمے دی پاکستان دی قومی کوششاں اچ مصر دی معاونت تے وی اطمینان ظاہر کیتے۔کاروباری اَتے اقتصادی تعاون ودھاوݨ کیتے، ݙوہیں فریقاں نجی شعبے دی شراکت داریاں اچ سہولت ݙیوݨ اَتے تجارتی رابطیں کوں ودھاوݨ کیتے ٹھوس اقدامات تے اتفاق کیتے۔ انہاں پاکستان-مصر بزنس کونسل اَتے پاکستان-مصر بزنس فورم قائم کرݨ دا وی فیصلہ کیتا، جیں دا اجلاس 2026 دی ݙوجھی سہ ماہی اچ، مشترکہ وزارتی کمیشن  (JMC) دے اجلاس دے موقع تے تھیسی۔ مصری وزیر خارجہ پاکستانی طلباء کیتے جامعہ الازہر دے وظائف دی تعداد ݙوگنی کرݨ دے فیصلے دا وی اعلان کیتے۔غزہ دی صورتحال تے ڳالھ مہاڑ کریندے ، پاکستان مصر دے اہم سفارتی اَتے انسان دوست کردار دی تعریف کیتی اے۔ ݙوہیں فریقاں 1967 توں پہلے دیاں سرحداں تے القدس الشریف کوں دارالحکومت بݨیندے ہک آزاد، خودمختار فلسطینی ریاست دے قیام دے آپݨے اصولی موقف دا اعادہ کیتے۔مصری وزیرخارجہ صدر مملکت آصف علی زرداری نال وی ملاقات کیتی اَتے دفاعی اَتے سلامتی تعاون کیتے جنرل ہیڈ کوارٹرز اچ فیلڈ مارشل سید عاصم منیر نال وی ملاقات کیتی اے۔ چھیکڑ اچ، ݙوہیں فریقاں علاقائی امن، استحکام اَتے مشترکہ خوشحالی کیتے رَل مِل تے کم جاری رکھݨ دے آپݨے عزم دا اعادہ کیتے۔