ساختی و ادارہ جاتی اصلاحات نال نویں معیشت بݨاوݨ حکومت دی پہلی ترجیح اے،  وفاقی وزیر خزانہ محمد اورنگزیب

اسلام آباد۔ 30 نومبر (اے پی پی) وفاقی وزیر خزانہ و محصولات سینیٹر محمد اورنگزیب آکھیے جو حکومت ملک اچ پائیدار معاشی ترقی کیتے نویں معیشت دے ودھارے اَتے ساختی و ادارہ جاتی اصلاحات کوں ٻہوں اہم ترجیح ݙیندی پئی اے۔ انہاں آکھیا جو مضبوط مالی نظم، مؤثر گورننس اَتے جدید اقتصادی ڈھانچے دے بغیر ملک لمبی مدت دی ترقی حاصل نی کرسڳدے۔وزیر خزانہ پریس کانفرنس نال خطاب کریندے آکھیا جو اڄوکے مہینے اچ ملک دی اقتصادی سرگرمیاں اچ واضح بہتری آئی اے، برآمدات دی کارکردگی بہتر تھئی اے، مجموعی برآمدات اچ 5 فیصد جݙاں جو آئی ٹی سروسز دی برآمدات اچ سالانہ بنیاداں تے 20 فیصد توں ودھ ودھارا ݙٹھا ڳئے۔ انہاں ݙسیا جو ملک اچ ترسیلات زر وی مضبوط رہی اے اَتے ایں سال 41 ارب ڈالر توں ودھ تھیوݨ دی توقع اے۔محمد اورنگزیب آکھیا جو حکومت قومی معیشت اچ نجی شعبے کوں مقابلے دے قابل بݨاوݨ کیتے سنجیدہ کوششاں کریندی پئی اے، پر نجی شعبے کوں وی صنعتاں اچ جدت اَتے پیداواری صلاحیت ودھاوݨ دی لوڑھ اے۔ انہاں آکھیا جو ٹیکس ٹو جی ڈی پی تناسب کوں 9 فیصد توں اڳوں گھِن ونڄݨا ہوسی۔ انہاں اے وی ݙسیا جو آئی ایم ایف دے ݙوہیں جائزے کامیابی نال پورے کیتے ڳئِن، جئیں نال عالمی مالیاتی اداریں دا اعتماد پاکستانی معیشت تے مضبوط تھئے۔