موسماتی تبدیلی پاکستان کیتے ہک فوری تے اوکھی معاشی حقیقت بَݨ ڳئی اے، وفاقی وزیر خزانہ دی آئی ایف اے سی دے صدر ژاں بوکو دی قیادت اچ وفد نال ملاقات اچ گالھ مہاڑ

اسلام آباد۔1 دسمبر (اے پی پی) وفاقی وزیر خزانہ تے محصولات سینیٹر محمد اورنگزیب آکھیا جو موسماتی تبدیلی پاکستان کیتے ہک فوری تے اوکھی معاشی حقیقت بَݨ ڳئی اے۔ حکومت پائیدار مالیاتی ڈھانچے کوں پکا کرݨ، گرین ٹیکسونومی (ماحول دوست سرمایہ کاری تے مبنی ٹیکس نظام) کوں مؤثر طریقے نال نافذ کرݨ تے climate-aligned disclosure frameworks (ماحولیات دے خطرات تے موقعیاں بارے معلومات ݙیوݨ آلے اداریں) دی ودھارے کیتے پرعزم اے۔ اے ڳالھیں وفاقی وزیر خزانہ سنوار دے ݙینہ وزارتِ خزانہ اچ آئی ایف اے سی دے صدر ژاں بوکو دی قیادت اچ آوݨ آلے وفد نال ملاقات دے دوران کیتن۔ وفد اچ ساؤتھ ایشین فیڈریشن آف اکاؤنٹنٹس (ایس اے ایف اے) دے صدر اشفاق یوسف تولہ اتے انسٹی ٹیوٹ آف کاسٹ اینڈ مینجمنٹ اکاؤنٹنٹس آف پاکستان (آئی سی ایم اے پی) دے صدر غلام مصطفیٰ قاضی وی شامل ہَن۔ ملاقات اچ آڈیٹر جنرل آف پاکستان مقبول احمد گوندل، چیئرمین سیکیورٹیز اینڈ ایکسچینج کمیشن آف پاکستان (ایس ای سی پی) عاکف سعید، اتے وزارتِ خزانہ دے سینئر اہلکار وی موجود ہَن۔ وزیر خزانہ ایس ایم ایز کوں اپنی مالیاتی رپورٹنگ کوں رسمی شکل ݙیوݨ دی لوڑھ تے زور ݙتا۔ انہاں ڈیجیٹل اثاثیاں تے اُبھردی ٹیکنالوجیز دے حوالے نال پاکستان دی فعال ریگولیٹری پیش رفت دا ذکر کیتا، جتھاں شفاف، منظم اتے قانون دے مطابق جدت کوں باضابطہ معیشت دا حصہ بݨاوݨ کیتے نویں ادارہ جاتی فریم ورک بݨائے ویندے پئن۔ انہاں آکھیا جو پاکستان دا پائیداری دا ایجنڈا، موسماتی مالی اعانت اتے گرین اکانومی دے اقدامات اوں نکتے ہَن جنہاں تے آ ئی ایف اے سی دے صدر گالھ مہاڑ کیتی۔ انہاں پاکستان دے موسماتی آفتاں نال بُری طرح متاثر تھیوݨ دی حقیقت دا ذکر کریندیں ہوئیں آکھیا جو حالیہ سیلابی تباہ کاری نال شرح نمو اچ گھٹ توں گھٹ ادھ فیصد دی ڳھٹکی  آوݨ دا تخمینہ اے۔ انہاں گرین فنانس اقدامات، قومی گرین ٹیکسونومی دے نفاذ اتے سٹیٹ بینک دے ذریعے پائیداری فریم ورک دے اجراء دے حکومتی عزم دا اعادہ کیتا۔ وزیر خزانہ آکھیا جو ایس ایم ایز کوں جدید دستاویزی تے رپورٹنگ نظام اپناوݨ اچ مدد کرݨ ٻہوں ضروری اے، خاص کر صنعتی تے برآمدی مرکزاں اچ جتھاں آگاہی تے تکنیکی استعداد دی ڳھٹکی  اے۔ ژاں بوکو وزیر خزانہ کوں آئی ایف اے سی دے مشن بارے ݙسیا، جو 143 ملکاں دیاں 188 رُکن تنظیماں تے مشتمل عالمی اکاؤنٹنگ کمیونٹی دی نمائندگی کریندے۔ انہاں پائیداری معیارات، آڈٹ دے معیار، اخلاقیات، پیشے تے اے آئی دے اثرات، چھوٹیاں تے درمیانی درجے دے پریکٹیشنرز دی استعداد کار، اتے سرکاری شعبے اچ اکاؤنٹنگ اصلاحات سویں موضوعات تے آئی ایف اے سی دی ترجیحات بیان کیتن۔ آڈیٹر جنرل مقبول احمد گوندل وفد کوں پاکستان اچ کیش توں “اکروئل بیسڈ آئی پی ایس اے ایس معیارات” اچ منتقلی دے عمل تے بریفنگ ݙتی۔ چیئرمین ایس ای سی پی عاکف سعید ریگولیٹری ہم آہنگی، بیمہ، پنشن، کیپٹل مارکیٹ اصلاحات اتے پائیداری انکشافات دے مرحلہ وار نفاذ بارے ݙسیا۔