وزیر خزانہ سینیٹر محمد اورنگزیب آئی ایم ایف رپورٹ دی اشاعت کوں روکݨ دا تاثر مسترد کر ݙتے

اسلام آباد۔ ۱ دسمبر(اے پی پی) وزیر خزانہ سینیٹر محمد اورنگزیب سینیٹ اچ ایں تاثر کوں سختی نال مسترد کر ݙتے جو حکومت آئی ایم ایف دی گورننس اتے کرپشن ڈائیگناسٹک اسیسمنٹ رپورٹ دی اشاعت اچ دیر کیتی یا ایکوں روکݨ دی کوشش کیتی۔ انہاں آکھیا جو رپورٹ جاری تھیوݨ توں پہلے اوندے تے جامع جائزہ ڳھدا ڳیا، جیندے اچ تیکھے مشورے شامل ہن۔ ایوان بالا دے اجلاس اچ سینیٹر کامران مرتضیٰ دی تحریک تے بحث نمٹیندے وزیر خزانہ ایوان کوں ݙسایا جو آئی ایم ایف دی رپورٹ اچ کرپشن کوں ترقی دی راہ اچ ہک سنگین رکاوٹ قرار ݙتا ڳئے، پر اشاعت اچ دیر دے دعوے غیر منطقی ہن۔ انہاں آکھیا جو میں نجی شعبے توں آیا ہم، جݙݨ کوئی رپورٹ جاری تھیندی اے تاں ایکوں متعلقہ اداریاں کوں بھیڄیا ویندے، فیڈ بیک ڳھدا ویندے، کڄھ نکتے شامل ہوندن اتے کڄھ رد کر ݙتے ویندن، اے عمل ݙو توں ݙھائی مہینے وی ڳھن سڳدے، اتھاں وی ایہو طریقہ کار اپنایا ڳیا، تقریباً سو اجلاس تھئے، 30 ادارے شامل ہن، اتے تفصیلی مشورے دے بعد رپورٹ جاری کیتی ڳئی۔ انہاں واضح کیتا جو حکومت ولوں پورے عمل اچ پوری سہولت ݙتی ڳئی اتے رپورٹ نہ شائع کرݨ دی کوئی وجہ موجود ہی کائینی۔ وزیر خزانہ ݙسایا جو حکومت مختلف نظاماں دی ڈیجیٹلائزیشن تے کم کیتا ویندا پئے تاں جو لیکیج کوں گھٹ کیتا ونڄے اتے انسانی مداخلت ہٹا تے کرپشن تے قابو پایا ونڄے۔ انہاں گورننس اچ بہتری، تکنیکی وزارتاں دی استعداد کار اتے افسراں دیاں تنخواہواں دے ڈھانچے بارے نکتے دی تائید کیتی اتے آکھیا جو اے معاملے سول سروس ریفارمز کمیٹی دے زیر غور ہین جیندی سربراہی وزیر منصوبہ بندی احسن اقبال کریندے پئن اتے او آپ وی ایندے رکن ہین۔ وزیر خزانہ ݙسایا جو وزیراعظم شہباز شریف خود “کیش لیس اتے ڈیجیٹل پاکستان” دے وژن دی نگرانی کریندے پئن جیندے کیتے دسمبر 2025، جون 2026 اتے دسمبر 2026 دی واضح ٹائم لائن مقرر کیتی ڳئی اے اتے حکومت ایوان دی خواہش تے پیشرفت توں آگاہ کریسی۔ بحث اچ سینیٹرز جام صفی اللہ خان اتے محمد عبدالقدیر وی حصہ ڳھدا اتے گورننس دیاں خامیاں، ٹیکس انتظامیہ دی کمزوریاں اتے ادارہ جاتی اصلاحات دی لوڑھ تے زور ݙتا۔ ارکانِ پارلیمنٹ اتفاق کیتا جو کرپشن دا خاتمہ اتے گورننس کوں مضبوط بݨاوݨ عوامی اعتماد دی بحالی اتے پاکستان دی معاشی سمت کوں مستحکم کرݨ کیتے ضروری اے۔