یارہویں این ایف سی ایوارڈ دے معاملیاں کوں کامیابی نال مُکاݨ اساݙی منزل اے، وفاقی وزیر خزانہ محمد اورنگزیب دا اجلاس نال خطاب

اسلام آباد۔ 4 دسمبر (اے پی پی) وفاقی وزیر خزانہ تے محصولات سینیٹر محمد اورنگزیب آکھیا جو قومی مالیاتی کمیشن دا کردار مُلک اچ وسائل دی منصفانہ ونڈ، مالیاتی استحکام اَتے پائیدار معاشی ترقی کیتے بُنیادی اہمیت رکھیندے، 11ویں این ایف سی ایوارڈ دے معاملیاں کوں کامیابی نال مُکاݨ اساݙی منزل اے۔ اے ڳآلھیں انہاں خمیس کوں وزارت خزانہ اچ 11ویں قومی مالیاتی کمیشن دے افتتاحی اجلاس نال خطاب کریندیں ہوئیں کیتا، وزیر خزانہ وزرائے اعلیٰ، صوبائی وزرائے خزانہ، سیکرٹری صاحبان، اَتے ٻئے رُکناں دا 11ویں نیشنل فنانس کمیشن دے افتتاحی اجلاس اچ شرکت تے شکریہ ادا کریندے ہوئیں آکھیا جو اڄ دا اے اجلاس اساݙے کیتے آئینی ذمّے واری اَتے آپسی تعاون دا اہم موقع اے، اے معزز فورم آئینِ پاکستان دے آرٹیکل 150 دے تحت قائم کیتا ڳیا ۔ وزیر خزانہ آکھیا جو 10ویں این ایف سی ایوارڈ دی مدت 21 جولائی 2025 کوں پُوری تھی ڳئی اے اَتے ایں پچھوکڑ اچ ایں اجلاس دی اہمیت ٻئی ودھ ویندی اے۔ وزیر خزانہ آکھیا جو وفاقی حکومت دا صاف اَتے پکا عزم ہا جو 11ویں این ایف سی دا افتتاحی اجلاس کہیں وی دیر دے بغیر سݙیا ونجے۔ وزیراعظم خود ایں گالھ اچ دلچسپی گھدی جو اے اجلاس جلدی توں جلدی تھیوے اَتے صوبیاں وی ایں آئینی ذمّے واری کوں صحیح ویلھے تے ادا کرݨ دا بھرپور ارادہ ظاہر کیتا۔ انہاں آکھیا جو پنجاب، خیبر پختونخوا اَتے سندھ اچ آوݨ آلے تباہ کُن سیلاب دے سبب اجلاس موخر کرݨا پیا۔ این ایف سی دے حوالے نال قیاس آرائیاں اَتے خدشیاں دا بہترین حل مخلصانہ اَتے شفاف گالھ مہاڑ اے۔ اڄ اساں اِتّھاں کھُلے ذہن اَتے بغیر کہیں تعصب دے موجود ہیسے اَتے اساݙی پہلی ترجیح ہک ݙوجھے دی گالھ سُݨݨ اے۔ وفاقی حکومت اِتّھاں صوبیاں دے موقف کوں سُݨݨ کیتے موجود اے۔ وزیر خزانہ آکھیا جو انہاں کوں امید اے جو صوبے وی ہک ݙوجھے دے نال تعمیری تعاون دے جذبے نال اگّوں ودھسن۔ صوبیاں ولّوں قومی مالیاتی معاہدہ تے دستخط ٻہوں قابلِ قدر اقدام اے اَتے اے اساݙے سانجھے عزم اَتے قومی مفاد اچ رَل تے کم کرݨ دی صلاحیّت دا ثبوت اے۔ صوبیاں ولّوں ضروری سرپلسز دے حصول اَتے آئی ایم ایف پروگرام تے عمل درآمد کوں پکا بݨاوݨ تے تعاون قابلِ تحسین اے۔ وزیر خزانہ آکھیا جو ایں سال مُلک کوں بھارت ولّوں غیر معمولی خطرے اَتے تکڑے سیلاباں سویں چیلنجز دا سامݨا کرݨا پیا، اِنہاں اوکھے حالات اچ اساں ہک مضبوط وفاق دی صورت اچ متحد کھڑے رہیے اَتے ایہو او جذبہ اے جئیں کوں اساں 11ویں این ایف سی ایوارڈ دے عمل اچ وی برقرار ݙیکھݨا چاہندوں۔ انہاں آکھیا جو این ایف سی دا کردار مُلک اچ وسائل دی منصفانہ ونڈ، مالیاتی استحکام اَتے پائیدار معاشی ترقی کیتے بُنیادی اہمیت رکھیندے۔ اے فورم اساں کوں موقع ݙیندے جو اساں بہترین حکومتی ذہناں کوں ہک جاہ تے جمع کر تے سانجھی سوچ اَتے آپسی سِکھݨ دے عمل کوں اگّوں ودھیسوں۔ آوݨ آلے ہفتیاں اَتے مہینیاں اچ اے بامقصد اَتے تعمیری مباحث جاری راہسن اَتے امید اے سارے رُکن بامعنی اَتے جامع گالھ مہاڑ کیتے بھرپور عزم نال اگّوں ودھسن۔ وزیر خزانہ آکھیا جو ہک ݙوجھے دی گالھ سُݨݨ اَتے آپسی اتحاد، تعاون اَتے آپسی احترام دے جذبے دے نال معاملیاں کوں اگّوں ودھیسوں اَتے 11ویں این ایف سی ایوارڈ دے معاملیاں کوں کامیابی نال مُکاݨ اساݙی منزل اے۔