ہک ڄݨا اَتے اوںدا بیانیہ قومی سلامتی کیتے خطرے دی ٹلی ٻݨدا ویندے، کہیں کوں عوام اَتے فوج دے خلاف بھڑکاوݨ اَتے انہاں اچ دراڑ پاوݨ دی اجازت نا ݙیسوں۔ ڈی جی آئی ایس پی آر لیفٹیننٹ جنرل احمد شریف چوہدری دی پریس کانفرنس

اولپنڈی۔ 5 دسمبر(اے پی پی)پاک فوج دے شعبہ تعلقات عامہ (آئی ایس پی آر) دے ڈائریکٹر جنرل لیفٹیننٹ جنرل احمد شریف چوہدری آکھیے جو ہک ڄݨا اَتے اوںدا بیانیہ قومی سلامتی کیتے خطرے دی ٹلی ٻݨدا ویندے، کہیں کوں عوام اَتے فوج دے خلاف بھڑکاوݨ اَتے انہاں اچ دراڑ پاوݨ دی اجازت نا ݙیسوں، انہاں دے کوڑ اَتے بغیر سر پیر بیانیے دی بُنیاد تے بھارتی اَتے افغانی میڈیا پاکستان دے خلاف ہرزہ سرائی کریندے، دہشت گرداں نال مذاکرات کیتے تیار نئیں، صرف افغان طالبان رجیم نال ریاست دی سطح تے ڳالھ مہاڑ تھیسی۔ اے ڳالھ انہاں اہم پریس کانفرنس اچ آکھی۔ انہاں آکھیا جو چیف آف ڈیفنس فورسز دی تعیناتی تے مبارکباد ݙینداں، چیف آف ڈیفنس فورسز کم شروع کر ݙتے، موجودہ وارفیئر دی صورتحال اچ زمینی، فضائی، بحری اَتے سائبر سودھا سارے شعبیاں دا ہک مٹھ تھی تے کم کرݨ ضروری اے، اے اقدام دیرینہ لوڑ ہئی، ٻئے مُلکاں اچ وی ایہو ڄھیں ہیڈکوارٹرز ہین، پارلیمنٹ دی ہدایت تے اے اقدام مُلکی دفاع دا اہم سنگ میل اے۔ انہاں آکھیا جو ڄمے پاروں قومی سلامتی کوں خطرات ہین، جیندی ذات اَتے خواہشات ریاست پاکستان توں ودھ ہِن اَتے او اتنیاں ودھ ہین جو جو او سمجھدے ڄیکر میں نئیں تاں کُجھ وی نئیں، اوںدا نظریہ پاکستان دی قومی سلامتی کیتے خطرے دا سبب اے، اوںدی سیاست مُک ڳئی اے، او اَتے اوںدا بیانیہ ریاست کیتے خطرے دی ڳالھ اے ڄیکوں ٻاہر دے ایکٹرز دے ذریعے ودھاوا مِلدا پئے۔ انہاں آکھیا جو اساں مُلک دی کہیں سیاسی جماعت، لسانیت، مذہب، فرقہ یا مکتبہ فکر دی نمائندگی نئیں کریندے، ساݙا تعلق کہیں ایلیٹ طبقے نال کائنی، اساں مڈل کلاس دے ہیں، اساں وطن دے تحفظ اَتے استحکام کیتے ݙینہہ رات قربانیاں ݙیندے پئے ہیں، اساں ول ول واڄح کر چکیے ہیں جو مسلح افواج پاکستان دیاں محافظ ہین ڄیکر کوئی آپݨیں ذات اَتے آپݨیں نامناسب سوچ کیتے فوج اَتے اوںدی لیڈر شپ تے حملے کریندے تاں اے چنڳی ڳالھ نہیں، اساں ساریاں سیاسی جماعتاں دا احترام کریندے ہہیں، تساں جو وی سیاست کرݨی اے کرو، فوج کوں اوں توں پرے رکھو، اساں سیاست دا حصہ نئیں، فوج اَتے عوام وچال دراڑ پاوݨ دی کہیں کوں اجازت نئیں ݙتی ونڄ سڳدی۔ ڈی جی آئی ایس پی آر آکھیا جو اے برداشت نا کیتا ویسی جو پاکستان دے عوام کوں فوج دے خلاف بھڑکایا ونڄے، ااے فوج مُلک دی ڈھال اے، فتنہ الخوارج فتنۃ الہندوستان، بھارت اَتے عوام وچال ایہا فوج کھڑی اے، ایں ہک بندے ریاست مخالف بیانات ݙتے، کہیں آئین اَتے سیاست اچ ایںدی اجازت اے جو مجرم نال ملاقات کیتی ونڄے جو مُلک اَتے پاک فوج دا بیانیہ بݨاوے، ایں ہک بندے بجلی دے بل جمع نہ کراوݨ، ترسیلات زر پاکستان نہ گھن آوݨ دی ترغیب ݙتی، عوام کوں فوج دے خلاف بھڑکایا۔ ڈی جی آئی ایس پی آر ہک ویڈیو وی پیش کیتی جیںدے اچ ݙسایا ڳیا جو تحریک انصاف دے سوشل میڈیا اکاؤںٹس افغانستان اَتے بھارت توں ہینڈل تھیندے پئن۔ انہاں علیمہ خان دا ویڈیو بیان پیش کیتا جیںدے اچ او بھارتی ٹی وی نال ڳالھ کریندی پئی ہئی۔ ڈی جی آئی ایس پی آر آکھیا جو بھارتی میڈیا کتنی خوشی نال پاکستان دے آرمی چیف دے خلاف بیانات چلیندے اَتے اوں کوں اے بیانات کون ݙیندے؟ ایہا جماعت، ایہے لوک پاکستان دی فوج دے خلاف گالھ کریندن، ایں جماعت دے سوشل میڈیا اکاؤںٹس ݙیکھو، کتھوں توں ٹویٹ تھیندی اے اَتے کون اوکوں چیندے اے سب ایں ویڈیو اچ ݙیکھو۔ پاک فوج دے ترجمان آکھیا جو بھارت دے نال نال افغان میڈیا وی پاکستان دے پِچّھوں لڳا ہویا اے، آئین اچ اظہار رائے دی آزادی دی اجازت اے پر قومی سلامتی تے اظہار رائے اَتے فوج دے خلاف بیاناں دی اجازت کائنی، اے لوک آپݨیں بیانیے کوں کھنݙاوݨ دا آھدن اَتے افغانستان اَتے بھارت دے لوک انہاں بیاناں کوں ودھاوا ݙیندن، بھارتی میڈیا پاکستانی فوج دے خلاف پی ٹی آئی دی زبان بݨیا ہویا اے، خوارج دا سہولت کار افغان میڈیا وی انہاں دے بیاناں کوں اُچھلیندے۔ عمران خان آکھیا جو جیڑھا بندہ فوج اچ موجود لوکاں نال تعلق رکھسی او غدار اے، ڄیکر میں علامہ اقبال یونیورسٹی دے طلباء نال مِلیاں تاں کیا او لوک غدار ہِن؟ تساں آپݨے آپ کوں سمڄھدے کیا او؟ توں کون ہیں جیڑھا غداری دے سرٹیفکیٹ ونݙیندے؟ اوںدی منطق اے اے جو جیڑھا پاک فوج نال تعلق رکھے او غدار اے جیڑھا آئی ایس پی آر ونڄے او غدار اے۔ ڈی جی آئی ایس پی آر پی ٹی آئی دے چیئرمین عمران خان کوں ذہنی مریض قرار ݙے ݙتا اَتے آکھیا جو ایں ذہنی مریض 9 مئی کوں فوجی تنصیبات اَتے شہیداں دیاں یادگاراں تے حملے کروائے، ݙو ݙینہہ پہلوں ٹویٹ کیتا ڄیکوں افغان اَتے بھارتی میڈیا منٹاں اچ وائرل کیتا، اے پاکستان دے خلاف ہرزہ سرائی کریندا پئے، انہاں دی پارٹی توں پُچھو تاں آھدن جو ساکوں نی پتا عمران خان دے ٹویٹ کتھوں تھیندن؟ ترجمان پاک فوج آکھیا جو اے آھدے فوج دی ایں قیادت کوں ٹارگٹ کرو جئیں معرکہ حق اچ پاکستان کوں فتح ݙیوائی، اصل بیانیہ ایہو ݙیندے اَتے اے صرف پاک فوج دے خلاف بیانیہ بݨیندے، فوج دے خلاف مسلسل پروپیگنڈا کیتا ویندا پئے، پروپیگنڈا سیل آپݨیں مرضی نال کہیں دے وی خلاف نوٹیفکیشن ٻݨا گھندے، ایں جماعت دے پیروکار بھارتی میڈیا کوں مسلسل مواد مہیا ݙیندن، انہاں دی منطق دے مطابق بھارت چھی اَتے ست مئی کوں پاکستان کوں فتح کر چکیا ہا، اے تاں پشاور اچ خارجیاں دا دفتر کھلواوݨ چاہندے ہن، اے دہشت گرداں کوں فوج دے خلاف رستے ݙکھیندے، آپݨیں ذات دے ایں قیدی دا بیانیہ قومی سلامتی دے خلاف اے، اے آئی ایم ایف توں آھدے پاکستان کوں قرض نہ ݙیو، ہݨ اے بیانیہ نا چلسی۔
انہاں آکھیا جو پاک فوج دے افسراں دا تعلق ایلیٹ طبقے نال کائنی، اساں عوام اچوں آئے ہیں، اساݙے افسر اَتے نوجوان دہشت گردی دے خلاف جنگ اچ شہید تھیندے پئِن، توں فوج تے تنقید کریندیں، آپݨیں پُتّراں کوں تاں توں ٻاہر رکّھیا ہویا اے ذرا خارجیاں دے سامݨیں انہاں کوں کھڑا تاں کرو۔ انہاں دا آکھݨ ہا جو مسلح افواج دے خلاف نفرت دا ٻیڄ ٻیڄیا ویندا پئے حالانکہ پاک فوج دا جوان آپݨیں جان تلی تے رکھ تے میدان جنگ اچ ویندے، خارجیاں دے سامݨیں کون کھڑا تھیندے؟ کون آپݨیاں جاناں ݙیندے؟ اساں جاناں ݙیوݨیاں اَتے گھنݨیاں ہوندن۔ 18 لکھ توں ودھ غیر قانونی غیر مُلکیاں کوں مُلک توں کڈھ چُکے ہیں، ایں سال انسداد دہشت گردی دے 13 ہزار توں ودھ آپریشن کیتے ڳئے، جیںدے اچ 1943 دہشت گرد ماریے ڳئن۔ نیشنل ایکشن پلان تے عملدرآمد ضروری اے، دہشت گردی مکاوݨ کیتے سانجھا بیانیہ ضروری اے۔ ترجمان پاک فوج آکھیا جو تہاݙی جیڑھے صوبے اچ حکومت اے ذرا اوںدے بارے تاں گالھ کرو، صوبائی حکومت منشیات اَتے نان کسٹم پیڈ گاݙیاں دا خاتمہ کرݨے، امن و امان دے قیام دی ذمّے واری صوبائی حکومت دے کولو اے، کے پی توں افغان مہاجرین دے خاتمے دا نوٹیفکیشن کیوں جاری نی کیتا ڳیا، کے پی اچ دہشت گردی چلدی پئی اے، اے آھدن آپریشن نہ کرو، اے آھدے جو دہشت گرداں نال مذاکرات کرو، کیڈٹ کالج وانا تے حملے کرݨ آلیاں نال اساں کیا گالھ کروں؟ اے ہک ٹولہ ساݙے کے پی آلے بھراواں تے مُسلّط تھی ڳئے، بیمار ذہناں بارے قوم صاف طور تے جاݨ چُکی اے، منفی بیانیہ مُکاوݨ دی لوڑ اے، اے بندہ ول ول شیخ مجیب الرحمان دی گالھ کریندے، تہاݙی سیاسی شعبدے بازی دا ویلھا مُک ڳیا۔ انہاں آکھیا جو پاکستانی میڈیا ریٹنگ کیتے غیر ایشوز تے گالھ کریندے انہاں کوں چاہیدے جو ایشوز تے گالھ کرن، ہر بندہ مُلک بچاوݨ دا ذمّے وار اے۔ ڈی جی آئی ایس پی آر آکھیا جو کہیں دا پیو وی پاک فوج اَتے عوام وچال دراڑ نئیں پا سڳدا، ریاست فوج نئیں ہوندی، ریاست حکومت ہوندی اے اَتے فوج ریاست دا ہک ادارہ اے، اساں کتھائیں نی ویندے پئے، جے تئیں پاکستان اے فوج راہسی۔ صحافیاں کوں ولدا ݙیندے انہاں آکھیا جو گورنر راج اَتے سوشل میڈیا دے حوالے نال فیصلہ کرݨا ریاست دا کم اے۔ اساں آئین تے عمل کرݨے، دہشت گردی ہک ݙینہہ اچ مُک نی سڳدی، ایں کیتے سیاسی عزم دی لوڑ اے، اساں ہک زبان تھی تے بیانیہ بݨایا تساں اوںدے برعکس کم کریندے پئے او، تساں ہر شے تے سیاست کوں اڳونہا کر ݙتے، اے آھدن فوج سیاست کریندی پئی اے لڑ نی سڳدی پر اساں لڑ تے ݙسایا، اساں ایں ریاست دے تحفظ دی قسم چاتی اے، نیشنل ایکشن پلان تے عملدرآمد ضروری اے۔ انہاں آکھیا جو تاریخ اچ پاک فوج کہیں دے بارے اچ اینڄھی گالھ نئیں کیتی کیوں جو ماضی اچ کہیں سیاست دان ایہو جیہاں کم نی کیتا، انہاں دی سیاست صرف پاک فوج دے آسوپاس ٻھرکدی اے، اے سمجھدن جو عوام کوں بے وقوف بݨایا ونڄ سڳدے پر ایویں کائنی، ہݨ ویلھا اے جو اساکوں ݙساوݨا پوسی جو اے بیانیہ کون چلیندا پئے۔ انہاں آکھیا جو مُلک اچ ایں ویلھے سَب توں زیادہ دہشت گردی خیبرپختونخوا اچ تھیندی پئی اے، گزریل پنج سالاں اچ کے پی اچ کہیں دہشت گرد کوں پھاسی تے لٹکایا ڳیا؟ صوبہ خیبرپختونخوا اچ صحت، تعلیم، امن و امان اَتے تعلیم دی صورتحال کیا اے۔ انہاں کوں نظم و نسق اَتے کارکردگی نال غرض کائنی، انہاں دی سیاست فوج اَتے ریاست مخالف بیانیہ، مس انفارمیشن اَتے ڈس انفارمیشن تے مبنی اے۔ انہاں آکھیا جو پاکستان کݙاہیں وی مذاکرات توں انکار نی کیتا، پاکستان مسلسل افغان طالبان دی حکومت نال مذاکرات کریندا رہے۔ انہاں آکھیا جو اساں دہشت گرد فتنہ الخوارج نال گالھ نا کریسوں، اساں ریاست ہیں اَتے ریاست دی سطح تے ہی افغان طالبان رجیم نال گالھ مہاڑ کریسوں، دہشت گرداں دے سہولت کاراں نال کیویں گالھ کروں؟ انہاں آکھیا جو نو مئی دے مقدمات دا فوجی عدالتاں اچ میرٹ اَتے شفافیت دے ذریعے ٹرائل کیتا ڳیا۔ پاک فوج دے جوان مُلک کیتے ہر قربانی ݙیوݨ کیتے تیار ہِن۔ نو مئی دا مقدمہ پُوری قوم دا مقدمہ اے۔