بین الاقوامی مالیاتی فنڈ (آئی ایم ایف) دے انتظامی بورڈ پاکستان کیتے 1.2 ارب ڈالر قسط دی منظوری ݙے ݙتی

اسلام آباد۔ 9 دسمبر(اے پی پی)بین الاقوامی مالیاتی فنڈ دے انتظامی بورڈ توسیعی فنڈ سہولت (EFF) دے تحت پاکستان کیتے تقریباً1 ارب ڈالر اَتے ریزیلئینس اینڈ سسٹین ایبلیٹی فنڈ (RSF) دے تحت تقریباً 200 ملین ڈالر فنڈز دی منظوری ݙے ݙتی اے۔ آئی ایم ایف دے انتظامی بورڈ توسیعی فنڈ سہولت دے تحت پاکستان دے اقتصادی اصلاحات دے پروگرام دے ݙوجھے جائزے دی تکمیل کر ڳھدی اے، ایںدے نال نال ریزیلئینس اینڈ سسٹین ایبلیٹی فنڈ دے تحت پروگرام دے پہلے جائزے دی منظوری وی ݙے ݙتی گئی اے۔ ایں فیصلےنال توسیعی فنڈ سہولت دے تحت پاکستان کیتے تقریباً 1 ارب ڈالر اَتے ریزیلئینس اینڈ سسٹین ایبلیٹی فنڈ دے تحت تقریباً 200 ملین ڈالر فوری طور تے جاری تھیسن، جیںدے نال ݙوہیں انتظامات دے تحت کل رقوم دی ادائیگی تقریباً 3.3 ارب ڈالر تئیں پہنچ ڳئی اے۔ آئی ایم ایف25 ستمبر 2024 کوں پاکستان کیتے37 مہینے تے مشتمل توسیعی فنڈ سہولت پروگرام دی منظوری ݙتی ہائی جیںدا مقصد معیشت کوں لچکدار بݨیندے ہوئیں پائیدار ترقی کوں ممکن بݨاوݨ اے۔ ایں پروگرام دیاں بنیادی ترجیحات اچ مستحکم معاشی پالیسیاں دے مسلسل نفاذ دے ذریعے کلی معیشت دا استحکام، زرمبادلہ دے ذخائر دی بحالی، ٹیکس دے دائرہ کار اچ توسیع، مقابلہ اَتے پیداواری صلاحیت اچ ودھارے کیتے اصلاحات، سرکاری اداریاں اچ اصلاحات، عوامی خدمات دی فراہمی اچ بہتری، انسانی اَتے فزیکل سرمائے دی ترقی اَتے توانائی دے شعبے دی پائیدار بحالی شامل ہن۔ توسیعی فنڈ سہولت دے تحت پاکستان دی پالیسی کوششاں نال عالمی ماحول اچ چینلجز اَتے حالیہ شدید سیلاب دے باوجود معیشت کوں مستحکم کرݨ اَتے اعتماد دی بحالی اچ نمایاں پیش رفت تھئی اے۔ مالیاتی کارکردگی مضبوط رہی اے، مالی سال2025 اچ1.3 فیصد بجٹ سرپلس ہدف موجب ملیے۔ افراطِ زر اچ ودھارا تھئی ڄیڑھا سیلاب پاروں خوراک دیاں قیمتاں اچ ودھارے دا نتیجہ اے ٻھل ایں ودھارے کوں عارضی سمجھیا ویندا پئے۔ مالی سال 2025 مکݨ تے زرمبادلہ دے کل ذخائر14.5 ارب ڈالر تئیں پڄ ڳئن ڄیڑھے ہک سال پہلے9.4 ارب ڈالر ہن اَتے امید اے جو مالی سال 2026 اَتے درمیانی مدت اچ اے مزید بہتر تھیسن۔ آئی ایم ایف پریس ریلیز موجب28 مہینے تے مشتمل ریزیلئینس اینڈ سسٹین ایبلیٹی فنڈ پروگرام9 مئی 2025 کوں منظور تھئے اَتے اے قدرتی آفات دے خطرات اچ کمی کرݨ اَتے موسمیاتی موزونیت دے حوالے نال پاکستان دے حکام دی کوششاں اچ ہتھ ونݙیندا پئے جیندی ترجیحات اچ ہر عوامی سرمایہ کاری دے نظام اَتے قدرتی آفات دے خلاف لچک کوں مضبوط بݨاوݨ، پاݨی دے محدود وسائل دے استعمال کوں زیادہ موثر بݨاوݨ، قدرتی آفات دے ردعمل اچ وفاق اَتے صوبیاں وچال بہتر ہم آہنگی، بینکاں اَتے کارپوریٹ اداریاں ولوں ماحولیاتی خطرات بارے معلومات دے نظام کوں بہتر بݨاوݨ، پاکستان دی ماحولیاتی کمٹمنٹ کوں پورا کرݨ اَتے متعلقہ میکرو معاشی خطرات اچ کمی اچ مدد فراہم کرݨ شامل ہن۔ آئی ایم ایف دے ڈپٹی منیجنگ ڈائریکٹر اَتے قائم مقام چیئر نائجل کلارک آکھیا جو توسیعی فنڈ سہولت پروگرام دے تحت اصلاحات دے نفاذ پاکستان اچ حالیہ جھٹکیاں دے باوجود کلی معیشت دے استحکام کوں برقرار رکھݨ اچ مدد ݙتی اے۔ حقیقی جی ڈی پی اچ تیزی آئی اے، افراطِ زر دیاں امیداں مستحکم رہین اَتے مالیاتی اَتے بیرونی عدم توازن اچ مزید کمی آئی اے۔ انہاں آکھیا جو غیر یقینی عالمی ماحول دے سامݨے پاکستان محتاط پالیسیاں تے ٹردا پئے جیڑھا مزید استحکام پیدا کرݨ، اصلاحات اچ تیزی ڳھن آوݨ اَتے نجی شعبے دی قیادت اچ مستحکم اَتے پائیدار درمیانی مدت دی ترقی کیتے ضروری اقدامات دا سلسلہ جاری رکھݨا چاہندے