صنعتی اَتے زرعی شعبیاں کیتے بجلی دے ملھ اچ کمی، فی یونٹ قیمت 38 توں گھٹ کر تے 22 روپے 98 پیسے کر ݙتی گئی

اسلام آباد۔ 9 دسمبر(اے پی پی)حکومت صنعتی اَتے زرعی شعبیاں کیتے بجلی دے نرخاں اچ نمایاں کمی کیتی اے تاں جو کاروبار کرݨ دا خرچہ گھٹ تھیوے اَتے معاشی سرگرمیاں اچ ودھارا تھیوے۔ ترجمان وزارت توانائی موجب نویں ٹیرف ڈھانچے دے تحت زرعی صارفین کیتے اضافی استعمال کیتی ڳئی بجلی دی فی یونٹ قیمت38 روپے توں گھٹ کر تے 22 روپے 98 پیسے کر ݙتی گئی اے، جݙاں جو صنعتی شعبے کیتے وی نرخ34 روپے توں گھٹ کر تے 22 روپے 98 پیسے فی یونٹ مقرر کیتے گئن۔ نویں ٹیرف موجب زرعی صارفین جیڑھے اضافی 100 یونٹ استعمال کریندے ہن انہاں دی اوسط بجلی لاگت اچ تقریباً 7 روپے فی یونٹ کمی آوݨی چاہیدی اے۔ ایویں ہی صنعتی صارفین کیتے جیڑھے اضافی 1,000 یونٹس استعمال کریندے ہن اوسط لاگت اچ تقریباً 5 روپے فی یونٹ دی کمی تھیوݨ دی توقع اے۔ وفاقی حکومت دا آکھݨ اے جو اے اقدام ملکی معیشت دی بحالی اچ مثبت کردار ادا کریسی اَتے معیشت دے اہم پیداواری شعبیاں کوں خاطر خواہ ریلیف ݙیسی۔