انڈر 19 ایشیا کپ دے فائنل وچ بھارتی ٹیم دے رویے دی شکایت کیتے خط وقتی آئی سی سی کوں بھیڄ ݙتا ویسی، چیئرمین پی سی بی محسن نقوی

لاہور۔ 28 دسمبر(اے پی پی) چیئر مین پاکستان کرکٹ بورڈ محسن نقوی آکھیے جو انڈر 19 ایشیا کپ دے فائنل وچ بھارتی ٹیم دے رویے دے خلاف آئی سی سی کوں شکایت کیتے خط دا ڈرافٹ تیار تھی ڳئے جیڑھا وقتی بھیڄ ݙتا ویسی۔ قذافی اسٹیڈیم وچ پریس کانفرنس کریندے انھاں آکھیا جو اساں کرکٹ تے سیاست کوں انڄ رکھݨ چاہندوں ۔محسن نقوی آکھیا جو بھارتی کھݙاریاں دا رویہ ساریں ݙٹھے ، جے انھاں دے کھلاڑی ساݙے کھیݙاریاں نال ہتھ نی ملاوݨ چاہندے تاں اساکوں وی کوئی شوق کائنی، بھارت دے نال جیڑھا وی معاملہ ہوسی او برابری دی سطح تے ہوسی۔ انھاں اے وی ݙسایا جو پی ایس ایل کیتے ݙو نویاں ٹیماں دی بڈنگ 8 جنوری کوں تھیسی تے ملتان سلطان دی مینجمنٹ ایں واری پی سی بی خود کریسی۔