این ڈی ایم اے آندے کجھ ڈینہواراں اچ ملک دے مختلف حصیاں کوں متاثر کرݨ آلے مغربی ہواواں دے سسٹم پاروں موسمی ایڈوائزری جاری کر ݙتی

اسلام آباد۔ 29 دسمبر (اے پی پی) نیشنل ڈیزاسٹر مینجمنٹ اتھارٹی (این ڈی ایم اے) آوݨ آلے کجھ ڈینہواراں اچ ملک دے مختلف حصیاں کوں متاثر کرݨ آلے مغربی ہواواں دے سسٹم پاروں موسمی ایڈوائزری جاری کر ݙتی اے۔ سنوار  کوں این ڈی ایم اے دی پیشگوئی دے مطابق مغربی ہواواں دا سلسلہ 29 دسمبر 2025 دی رات توں ملک دے مغربی علاقیاں اچ داخل تھیوݨ دا امکان اے تے 30 دسمبر 2025 توں ایندے اچ شدت آ سڳدی اے۔ اے موسمی نظام 31 دسمبر کوں ملک دے زیادہ تر بالائی تے وسطی علاقیاں کوں آپݨی ولھیٹ اچ گھن گھنسی  اتے بالائی علاقیاں اچ 2 جنوری 2026 دی سویل تئیں برقرار رہݨ دا امکان اے۔ ایں موسمی نظام دے زیرِ اثر ناران، کاغان، دیر، سوات، کوہستان، مانسہرہ، ایبٹ آباد، شانگلہ، استور، ہنزہ، سکردو، مری، گلیات، وادی نیلم، باغ، پونچھ تے حویلی اچ 30 دسمبر دی رات توں 2 جنوری دی سویل تئیں برفباری پاروں سڑکاں دی بندش تے پھسلݨ دا خطرہ اے، ایں دوران بالائی خیبر پختونخوا، گلگت بلتستان تے آزاد جموں و کشمیر دے پہاڑی علاقیاں اچ لینڈ سلائیڈنگ تے برفانی تودے ڈھݨ دا وی امکان اے۔ سیاحاں کوں ہدایت کیتی گئی اے جو او بہوں احتیاط کرن تے حساس تے بلند پہاڑی علاقیاں اچ غیر ضروری سفر نہ کرن۔ ایں بارش دے سلسلے دے دوران وسطی تے جنوبی پنجاب تے بالائی سندھ اچ کوہیڑ دی شدت ڳھٹکی متوقع اے۔ این ڈی ایم اے تمام متعلقہ اداریاں کوں چوکنا رہݨ تے ہنگامی صورتحال نال نبڑݨ کیتے تیار رہݨ دی ہدایت کیتی اے۔