باجوڑ اچ انٹیلی جنس بیسڈ آپریشن، 5 بھارتی سپانسرڈ خارجی ہلاک، میجر عدیل زمان جامِ شہادت نوش کر گھدا، آئی ایس پی آر

راولپنڈی۔ 29 دسمبر (اے پی پی) سکیورٹی فورسز دے باجوڑ اچ انٹیلی جنس بیسڈ آپریشن اچ 5 بھارتی سپانسرڈ خارجی ہلاک تھی ڳئے جڈانجو میجر عدیل زمان جامِ شہادت نوش کر گھدے۔ پاک فوج دے شعبہ تعلقاتِ عامہ (آئی ایس پی آر) دے مطابق سکیورٹی فورسز 29 دسمبر 2025ء کوں ضلع باجوڑ دے علاقے خار اچ بھارتی پراکسی تنظیم فتنہ الخوارج توں تعلق رکھݨ آلے خارجیاں دی موجودگی دی اطلاع تے آپریشن کیتا۔ آپریشن دے دوران سکیورٹی فورسز دی موثر کارروائی دے نتیجے اچ 5 بھارتی سپانسرڈ خارجی جہنم واصل کر ݙتے ڳئے۔ ہلاک تھیوݨ آلے خارجیاں دے قبضے توں اسلحہ تے گولا بارود وی برآمد تھیے۔ اے دہشت گرد سکیورٹی فورسز، قانون نافذ کرݨ آلے اداریاں تے معصوم شہریاں دے قتل سودھے دہشت گردی دی کئی کارروائیاں اچ شامل ہن۔ شدید فائرنگ دے تبادلے دے دوران میجر عدیل زمان (عمر 36 سال، وسنیک ضلع ڈیرہ اسماعیل خان) جیڑھے جو ہراول دستے دی قیادت کریندے پئے ہن، بہادری نال لڑدے ہوئیں ملک تے قوم توں قربان تھی ڳئے تے جامِ شہادت نوش کیتا۔ علاقے اچ موجود کہیں وی ٻئے بھارتی سپانسرڈ خارجی دے خاتمے کیتے سینیٹائزیشن آپریشن جاری اے۔ آئی ایس پی آر دا آکھݨ اے جو نیشنل ایکشن پلان دی وفاقی ایپکس کمیٹی دے منظور شدہ وژن ’’عزمِ استحکام‘‘ دے تحت غیر ملکی امداد یافتہ دہشت گردی دی لعنت مکاوݨ کیتے سکیورٹی فورسز تے قانون نافذ کرݨ آلے اداریاں دی مہم پوری قوت نال جاری رہسی۔