بنگلہ دیش دی سابق وزیرِاعظم خالدہ ضیاء 80 سال دی عمر اچ انتقال کر ڳئن

ڈھاکہ۔ 30 دسمبر (اے پی پی) بنگلہ دیش دی سابق وزیرِ اعظم تے بنگلہ دیش نیشنلسٹ پارٹی (بی این پی) دی سربراہ خالدہ ضیاء 80 سال دی عمر اچ انتقال کر ڳئن، جیندا اعلان پارٹی کیتے ۔ اے ایف پی دے مطابق بی این پی توں جاری بیان اچ آکھیا ڳئے جو بی این پی دی چیئرپرسن تے سابق وزیرِ اعظم، قومی رہنما بیگم خالدہ ضیاء اج سویرے 6 وڄے فجر دی نماز توں فوراً بعد انتقال کر ڳئن۔ اساں انہاں دی روح کیتے دعا کریندوں اتے سب توں درخواست اے جو او انہاں کیتے دعا کرن۔خالدہ ضیاء کئی سالاں توں بیمار ہن تے قید دی تکلیفاں برداشت کیتیاں، پر نومبر اچ انہاں آندے سال فروری اچ تھیوݨ آلے انتخابات اچ حصہ گھنݨ دا وعدہ کیتا ہئی، جیڑھا گزشتہ سال عوامی احتجاج توں بعد انہاں دی حریف شیخ حسینہ دے اقتدار توں ہٹݨ توں بعد پہلا عام انتخاب تھیسی۔ بی این پی کوں انتخابات اچ سب توں ودھ کامیابی دے امکانات ݙتے ویندے پئن۔ نومبر دے آخری ایام اچ او ہسپتال منتقل کیتی ڳئی ہن، جتھاں طبی ماہرین دی پوری کوششاں دے باوجود انہاں دی صحت وگڑدی ڳئی۔ ایندے باوجود انہاں دی وفات توں کجھ گھنٹے پہلے، پارٹی کارکنان سنوار کوں انہاں ولوں ترائے حلقیاں اچ انتخابی کاغذات جمع کرائے ہن۔ انہاں دے آخری ݙینہاں اچ عبوری رہنما محمد یونس قوم توں خالدہ ضیاء کیتے دعا دی اپیل کیتی ہئی، تے انہاں کوں “قوم کیتے سب توں وݙی تحریک دا ذریعہ” قرار ݙتا ہئی۔ بی این پی دے میڈیا چیف مودود عالمگیر پویل وی اے ایف پی کوں انہاں دے انتقال دی تصدیق کیتی اے۔خالدہ ضیاء کوں 2018 اچ حسینہ حکومت دے تحت بدعنوانی دے الزامات اچ قید کیتا ڳیا ہئی، تے انہاں کوں علاج کیتے ٻاہرلے ملک ونڄݨ توں وی روکیا ڳیا ہئی۔ انہاں کوں گزریل سال رہا کیتا ڳیا جݙاں شیخ حسینہ کوں اقتدار چھوڑݨاں پیا۔ ایں مہینے دے شروع اچ انہاں کوں لندن گھن ونڄݨ کیتے خصوصی ایئر ایمبولینس دا منصوبہ بݨایا ڳیا ہئی، پر انہاں دی صحت اتنی بہتر کائنی ہئی جو اے ممکن تھی سڳے۔ انہاں دے پتر تے سیاسی رہنما طارق رحمان، جیڑھے 17 سال دی خود ساختہ جلاوطنی توں بعد خمیس کوں بنگلہ دیش واپس آئے ہن، پارٹی کوں فروری 12 دے عام انتخابات اچ قیادت ݙیسن تے جے پارٹی اکثریت حاصل کریندی اے تاں او وزیرِ اعظم دے طور تے نامزد کیتے ویسن۔ بنگلہ دیش دے اخبار پروتھوم الو دے مطابق خالدہ ضیاء “ناقابلِ تسخیر رہنما” دے لقب دی مالک ہن، تے انہاں دے انتقال دے وقت طارق رحمان تے ٻئے گھر آلے انہاں دے نال موجود ہن۔