صحت دا شعبہ قومی سلامتی دا ضامن، ون ہیلتھ اپروچ نال معیشت تے دفاع کوں مضبوط بݨیسوں، وفاقی وزیر صحت مصطفیٰ کمال

اسلام آباد۔ 30 دسمبر (اے پی پی) وفاقی وزیر برائے صحت مصطفیٰ کمال “ون ہیلتھ اپروچ” کوں پاکستان دے محفوظ مستقبل کیتے ناگزیر قرار ݙیندیں ہوئیں آکھیے جو صحت دا شعبہ ہݨ محض بیماریاں دے علاج تئیں محدود نئیں رہ ڳیا بلکہ بدلدے ہوئے عالمی تناظر اچ اے “قومی سلامتی” دا درجہ اختیار کرڳئے۔ اے ڳالھیں  انہاں “اینٹی مائکروبیل ریزسٹنس (اے ایم آر) تے ون ہیلتھ اپروچ” دے موضوع تے منعقدہ ہک اعلیٰ سطحی پالیسی ڈائیلاگ نال خطاب کریندیں ہوئیں کیتے۔ وفاقی وزیر ہک مثبت تے فکر انگیز نقطہ نظر پیش کریندیں ہوئیں آکھیا جو انسان آخری ساہ تئیں سکھݨ دے عمل اوچوں گزردے تے اج ساکوں اے سکھݨاں اے جو ہک مضبوط ہیلتھ کیئر سسٹم ای مستحکم معیشت تے ناقابلِ تسخیر دفاع دی بنیاد اے ۔ انہاں آکھیا جو کووڈ-19 دے تجربات دنیا کوں سکھایا جو امریکہ، چین تے انڈیا جیہیاں وݙیاں طاقتاں وی بیماریاں دے غیر معمولی ٻوجھ اڳوں بے وس تھی سڳدین، ایں کیتے ساکوں آپݨی تیاریاں کوں جدید خطوط تے استوار کرݨاں پوسی۔ مصطفیٰ کمال ایں عزم دا اظہار کیتا جو جے اساں اپݨے ہیلتھ سسٹم کوں درست کر گھدا تاں اے پاکستان دی معیشت تے دفاع سمیت پورے ریاستی نظام کوں تحفظ فراہم کریسی۔چیئرمین ٹیکنیکل ہیلتھ گروپ تے وائس چانسلر ہیلتھ سروسز اکیڈمی ڈاکٹر شہزاد علی خان ون ہیلتھ پروگرام دی کامیابیاں تے مستقبل دے لائحہ عمل تے روشنی پاتی۔نیشنل کوآرڈینیٹر ڈاکٹر طارق محمود علی شرکا کوں مسئلے دی تکنیکی نوعیت تے اہمیت بارے ݙسایا جو اینٹی بائیوٹکس دا غیر ضروری استعمال روک تے اساں اپݨی معیشت تے صحتِ عامہ کوں وݙا سہارا ݙے سڳدوں۔