کابینہ دی اقتصادی رابطہ کمیٹی دا اجلاس، پاکستان انڈر 19 مینز کرکٹ ٹیم دی بین الاقوامی کامیابی دے اعتراف اچ انعامی رقم دی ادائیگی کیتے تکنیکی ضمنی گرانٹ دی منظوری

اسلام آباد۔ 30 دسمبر (اے پی پی) کابینہ دی اقتصادی رابطہ کمیٹی (ای سی سی) پاکستان انڈر 19 مینز کرکٹ ٹیم کوں انہاں دی شاندار کارکردگی تے بین الاقوامی کامیابی دے اعتراف اچ انعامی رقم دی ادائیگی کیتے تکنیکی ضمنی گرانٹ دی منظوری ݙے ݙتی اے۔ کابینہ دی اقتصادی رابطہ کمیٹی (ای سی سی) دا اجلاس منگل کوں وزارتِ خزانہ اچ وفاقی وزیر خزانہ تے محصولات سینیٹر محمد اورنگزیب دی زیرِ صدارت تھیا۔ اجلاس اچ وفاقی وزیر توانائی سردار اویس احمد لغاری، وفاقی وزیر پٹرولیم علی پرویز ملک، وفاقی وزیر سرمایہ کاری قیصر احمد شیخ تے وزیر اعظم دے معاون خصوصی برائے صنعت تے پیداوار ہارون اختر خان شرکت کیتی جݙاں جو متعلقہ وزارتاں، ڈویژنز تے ریگولیٹری اداریاں دے وفاقی سیکریٹریز تے سینئر حکام وی موجود ہن۔ اجلاس دے آغاز اچ کمیٹی سابق وفاقی وزیر خزانہ تے سابق گورنر سٹیٹ بینک آف پاکستان ڈاکٹر شمشاد اختر دے ایصالِ ثواب کیتے فاتحہ خوانی کیتی۔ مرحومہ کوں خراجِ عقیدت پیش کریندیں ہوئیں وزیر خزانہ ملک کیتے انہاں دی گراں قدر خدمات کوں سراہیا تے آکھیا جو انہاں دی خدمات محض نگراں وزیر دے کردار تئیں محدود کائنی، بعد اچ نافذ کیتے ونجݨ آلے کئی اہم ادارہ جاتی تے ٹیکس پالیسی اصلاحات دا تصور انہاں دے دورِ کار اچ پیش کیتا ڳیا۔ اجلاس اچ کابینہ ڈویژن ولوں پاکستان انڈر 19 مینز کرکٹ ٹیم کوں انہاں دی شاندار کارکردگی تے بین الاقوامی کامیابی دے اعتراف اچ انعامی رقم دی ادائیگی کیتے تکنیکی ضمنی گرانٹ بارے سمری دی منظوری ݙے ݙتی ڳئی۔ وزیر خزانہ آکھیا جو ایں طرح دی حوصلہ افزائی نہ صرف کھیݙاں اچ اعلیٰ کارکردگی دا اعتراف اے بلکہ بین الاقوامی سطح تے ملک دی نمائندگی کرݨ آلے نوجوان ٹیلنٹ کیتے ترغیب دا باعث وی اے۔ اجلاس اچ دفاع ڈویژن ولوں بلٹ پروف گاݙیاں دی خریداری کیتے تکنیکی ضمنی گرانٹ بارے سمری دی وی منظوری ݙے ݙتی ڳئی۔ اجلاس کوں ݙسایا ڳیا جو اے فیصلہ موجودہ آپریشنل ضرورتاں تے سکیورٹی متعلق تقاضیاں کوں سامݨے رکھ تے کیتا ڳئے۔