نائب وزیر اعظم اسحاق ڈار دی صدارت کابینہ کمیٹی برائے نجکاری دا اجلاس،نجکاری دے عمل کوں تکھے حتمی شکل ݙیوݨ کیتے ویلھے تے اقدامات تے زور

اسلام آباد۔ 30 دسمبر (اے پی پی) نائب وزیر اعظم اتے وزیر خارجہ سینیٹر محمد اسحاق ڈار دی صدارت کابینہ کمیٹی برائے نجکاری دا اجلاس تھیا۔ سیکریٹری وزارتِ نجکاری پی آئی اے دی نجکاری دے آندے لائحہ عمل تے تفصیلی بریفنگ ݙتی۔ کابینہ کمیٹی برائے نجکاری پی آئی اے دے 75 فیصد حصص کیتے عارف حبیب کنسورشیم دی قیادت اچ قائم کنسورشیم دی 135 ارب روپے دی بولی دی توثیق کریندیں ہوئیں ایںدی منظوری کیتے کابینہ کوں سفارش کر ݙتی اے۔ دفتر خارجہ توں جاری بیان دے مطابق اجلاس اچ نائب وزیر اعظم سارے متعلقہ فریقین تے زور ݙتا جو ایں امید تے خواہش دے نال نجکاری دے عمل کوں تکھے حتمی شکل ݙیوݨ کیتے ویلھے تے اقدامات کیتے ونجن تانجو ایں قدم نال پی آئی اے آپݨے سنہرے دور کوں ولا حاصل کر سڳے۔ اجلاس اچ وزیر توانائی، وزیر اعظم دے مشیران برائے نجکاری، صنعت تے پیداوار، وزیر اعظم دے معاون خصوصی طارق باجوہ، بلال کیانی، وفاقی سیکریٹریز برائے کابینہ، نجکاری، دفاع، قانون، توانائی، کمیشن برائے نجکاری، صنعت تے پیداوار تے متعلقہ محکمیاں دے ٻئے سینئر افسران شرکت کیتی۔