وزیر اعظم شہباز شریف دی یو اے ای دے صدر شیخ محمد بن زاید النہیان نال ملاقات، ݙوہیں ملکاں وچال تعلقات کوں سٹریٹجک تے مفید اقتصادی شراکت داری اچ تبدیل کرݨ دے پختہ عزم دا اعادہ

رحیم یار خان۔ 30 دسمبر (اے پی پی) پاکستان تے متحدہ عرب امارات دی قیادت آئی ٹی، توانائی، کان کنی تے معدنیات تے دفاعی تعاون سودھے مختلف شعبیاں اچ تعاون ودھاوݨ دے امکانات تے تبادلہ خیال کیتے ، جݙاں جو وزیراعظم محمد شہباز شریف پاکستان تے متحدہ عرب امارات وچال دیرینہ تے برادرانہ تعلقات کوں سٹریٹجک تے آپسی طور تے مفید اقتصادی شراکت داری اچ تبدیل کرݨ دے پختہ عزم دا اعادہ کریندیں ہوئیں ݙوپاسہ تجارت اچ نمایاں اضافے دی لوڑھ تے زور ݙتے۔ وزیر اعظم آفس دے میڈیا ونگ توں جاری بیان دے مطابق وزیر اعظم محمد شہباز شریف منگل کوں شیخ زاید پیلس رحیم یار خان اچ متحدہ عرب امارات (یو اے ای) دے صدر تے ابوظہبی دے حکمران شیخ محمد بن زاید النہیان نال ملاقات کیتی۔ نائب وزیراعظم تے وزیر خارجہ سینیٹر محمد اسحاق ڈار، وفاقی وزیر اطلاعات عطاء اللہ تارڑ، وزیراعظم دے معاون خصوصی طارق فاطمی تے ٻئے اعلیٰ حکام وی ملاقات اچ موجود ہن۔ بیان دے مطابق ملاقات نہایت گرمجوش تے خوشگوار ماحول اچ تھئی جیندے اچ ݙوہیں رہنماواں 26 دسمبر 2025ء کوں اسلام آباد اچ تھیوݨ آلی اپݨی اڄوکی ملاقات اچ تھیوݨ آلی گالھ مہاڑ کوں اڳوں ودھایا۔ شیخ محمد بن زاید النہیان بطور صدر یو اے ای پاکستان دا اپݨا پہلا سرکاری دورہ کیتا۔ وزیراعظم پاکستان تے متحدہ عرب امارات وچال دیرینہ تے برادرانہ تعلقات کوں ہک سٹریٹجک تے آپسی طور تے مفید اقتصادی شراکت داری اچ تبدیل کرݨ دے پختہ عزم دا اعادہ کیتا۔ انہاں ݙوپاسہ تجارت اچ نمایاں اضافے دی لوڑھ تے زور ݙتا اتے اینکوں مطلوبہ سطح تئیں پڄایا ونج سڳے۔ ݙوہیں رہنماواں آئی ٹی، توانائی، کان کنی تے معدنیات تے دفاعی تعاون سمیت مختلف شعبیاں اچ تعاون ودھاوݨ دے امکانات تے وی ڳالھ کیتی۔ وزیراعظم شیخ محمد بن زید النہیان دی متحرک تے دوراندیش قیادت اچ متحدہ عرب امارات دی شاندار ترقی تے گہرے اطمینان تے تحسین دا اظہار کیتا تے ݙوہیں ملکاں وچال مضبوط تعلقات دے فروغ کیتے یو اے ای دے صدر دے عزم تے انہاں دا شکریہ ادا کیتا۔ انہاں متحدہ عرب امارات ولوں 21 لکھ پاکستانیاں دی میزبانی کوں وی سراہیا جیڑھے ݙوہیں ملکاں دے تعلقات کوں مضبوط بݨاوݨ اچ اہم کردار ادا کریندے پئن۔ ݙوہیں رہنماواں ݙوپاسہ تعاون دے علاوہ مختلف علاقائی تے عالمی امور تے وی ڳالھ کیتی۔ بیان دے مطابق اے ملاقات پاکستان تے متحدہ عرب امارات وچال ہک سال دے دوران قیادت دی سطح تے تھیوݨ آلے بھرپور روابط دا تسلسل اے۔