ریاض۔ 31 دسمبر (اے پی پی) سعودی عرب دی وزارتِ خارجہ متحدہ عرب امارات تے افسوس دا اظہار کیتے جو اوں جنوبی عبوری کونسل دی فوج تے دٻاؤ پا تے انہاں کوں سعودی عرب دی جنوبی سرحد تے حضر موت تے المهرہ اچ عسکری کارروائیاں کرݨ تے مجبور کیتا، جیڑھا مملکت دی قومی سکیورٹی تے یمن تے خطے اچ سکیورٹی و استحکام کیتے سنگین خطرہ ہن۔ العربیہ دے مطابق سعودی …
متحدہ عرب امارات نال ݙوپاسہ تعلقات برقرار رکھݨ دی توقع اے، سعودی عرب
ریاض۔ 31 دسمبر (اے پی پی) سعودی عرب دی وزارتِ خارجہ متحدہ عرب امارات تے افسوس دا اظہار کیتے جو اوں جنوبی عبوری کونسل دی فوج تے دٻاؤ پا تے انہاں کوں سعودی عرب دی جنوبی سرحد تے حضر موت تے المهرہ اچ عسکری کارروائیاں کرݨ تے مجبور کیتا، جیڑھا مملکت دی قومی سکیورٹی تے یمن تے خطے اچ سکیورٹی و استحکام کیتے سنگین خطرہ ہن۔ العربیہ دے مطابق سعودی وزارتِ خارجہ آکھیے جو اے اقدامات نہایت خطرناک ہن اتے یمن اچ آئینی حکومت دے اتحاد دے بنیادی اصولاں نال میل نئیں کھاندے تے نہ ای اے یمن دی سکیورٹی تے استحکام دے حصول دی کوششاں دی حمایت اچ ہن۔ سعودی عرب ایں ڳالھ تے زور ݙتے جو متحدہ عرب امارات کوں جمہوریہ یمن دی درخواست دے مطابق آپݨی افواج کوں 24 گھنٹیاں دے اندر یمن توں واپس کڈھݨا چاہیدے اتے یمن اچ کہیں وی فریق کوں کہیں وی قسم دی عسکری یا مالی مدد فراہم کرݨ توں پرہیز کرݨاں چاہیدے۔ مملکت ایں توقع دا اظہار کریندی اے جو حکمت تے بھائی چارے، حسنِ ہمسائیگی دے اصول، خلیج تعاون کونسل دے رکن ملکاں دے درمیان قریبی تعلقات تے برادر ملک یمن دے مفاد کوں مقدم رکھیا ونڄے۔ بیان اچ متحدہ عرب امارات تے زور ݙتا ڳیا جو او ایجھے اقدامات کرے جیڑھے ݙوپاسہ تعلقات کوں برقرار رکھݨ تے مستحکم کرݨ کیتے ضروری ہن۔ سعودی عرب تعلقات کوں فروغ ݙیوݨ تے خطے دے ملکاں دی خوشحالی تے استحکام کیتے سانجھی کوششاں تے یقین رکھیندے۔
