نائب وزیر اعظم محمد اسحاق ڈار کوں گورنر تبوک شہزادہ فہد بن سلطان بن عبدالعزیز دا ٹیلیفون

اسلام آباد۔ 31 دسمبر (اے پی پی) نائب وزیر اعظم اتے وزیر خارجہ سینیٹر محمد اسحاق ڈار کوں سعودی عرب دے شہر تبوک دے گورنر شہزادہ فہد بن سلطان بن عبدالعزیز ٹیلیفون کیتے۔ بدھ کوں دفتر خارجہ دے مطابق شہزادہ فہد بن سلطان بن عبدالعزیز نائب وزیر اعظم نال ڳالھ مہاڑ کریندیں ہوئیں انہاں کوں نویں سال دی مبارکباد ݙتی اتے نیک خواہشات دا اظہار کیتا۔ نائب وزیر اعظم شہزادہ فہد بن سلطان دے گرمجوش جذبات دا خیر سگالی نال جواب ݙتا۔ تبوک دے گورنر آپݨی ماضی دی مثبت ملاقات کوں یاد کریندیں ہوئیں نائب وزیراعظم کوں تبوک آوݨ دی دعوت ݙتی۔ ڳالھ مہاڑ اچ آپسی دلچسپی دے شعبیاں اچ تعاون ودھاوݨ دی خواہش دا اظہار کیتا ڳیا۔ نائب وزیر اعظم سینیٹر محمد اسحاق ڈار پاک سعودی تعلقات کوں فروغ ݙیوݨ اچ شہزادہ فہد دی ذاتی دلچسپی کوں سراہیا۔