وفاقی وزیر قومی غذائی تحفظ تے تحقیق رانا تنویر حسین دا کنڑک دی کاشت، ذخائر تے عبوری قومی کنڑک پالیسی دے نفاذ دی صورتحال دا جائزہ

اسلام آباد۔ 31 دسمبر (اے پی پی) وفاقی وزیر برائے قومی غذائی تحفظ تے تحقیق رانا تنویر حسین قومی گندم نگران کمیٹی دے ݙوجھے اجلاس دی صدارت کیتی جیندے اچ ربیع 2025–26 کیتے کنڑک دی کاشت دی پیش رفت، اڄوکی کنڑک دے ذخائر دی صورتحال تے عبوری قومی گندم پالیسی (آئی این ڈبلیو پی) دے تحت عملدرآمد دے طریقے دا جائزہ گھدا ڳیا۔ وزارتِ قومی غذائی تحفظ تے تحقیق دے اعلامیے دے مطابق اجلاس دے دوران سارے صوبیاں کوں ہدایت کیتی ڳئی جو او عبوری قومی گندم پالیسی دے موثر تے مربوط نفاذ کوں یقینی بݨاوݨ کیتے صوبائی سطح تے عملدرآمد یونٹس قائم کرن۔ کمیٹی صوبہ وار کنڑک دی کاشت دی پیش رفت دا جائزہ وی گھدا۔ پنجاب اچ کنڑک دی کاشت ویلھے تے مکمل کیتی ڳئی اے، جتھاں 90 فیصد کاشت شروع دے مرحلے اچ مکمل تھئی۔ صوبے اچ تصدیق شدہ کنڑک دے ٻیج دے استعمال اچ نمایاں ودھارا ݙیکھݨ اچ آئے جݙاں جو یوریا کھاد دے استعمال اچ وی اضافہ تھیے جیندی بنیادی وجہ بہتر دستیابی تے نسبتاً گھٹ قیمتاں ہن۔ سندھ اچ کنڑک دی کاشت دی پیش رفت تسلی بخش رہی اتے صوبہ آپݨے کاشت دے اہداف توں ودھ ڳئے۔ بلوچستان اچ بارشاں دی ڳھٹکی پاروں ایں ویلھے کنڑک دی کاشت نسبتاً گھٹ اے پر متوقع بارشاں توں بعد ایں ڳھٹکی دے پورا تھیوݨ دی توقع اے۔ خیبر پختونخوا اچ گندم دی کاشت دا وݙا حصہ مکمل تھی ڳئے پر برف باری آلے علاقیاں اچ کاشت دیر دا شکار اے۔