وزیر اعظم شہباز شریف دی صدارت جائزہ اجلاس، معیشت بارے وزارتاں دے عملی اقدامات، قلیل مدتی جامع حکمتِ عملی تے سفارشات طلب

اسلام آباد۔ 1 جنوری (اے پی پی) وزیر اعظم محمد شہباز شریف معیشت بارے ساری وزارتاں توں عملی اقدامات تے گھٹ توں گھٹ ویلھے تے مشتمل جامع حکمتِ عملی کیتے تجاویز طلب کر گھدیاں ہن اتے آکھیے جو سرمایہ کاراں دی سوکھ کیتے ادارہ جاتی تے انتظامی سہولیات دی فراہمی حکومت دی پہلی ترجیح اے، سرمایہ کاری اچ ودھارے کیتے برآمدات دے شعبے دی ترویج دی تجاویز تے مجوزہ ترقیاتی منصوبیاں کوں خصوصی اہمیت ݙتی ونڄے، موثر معاشی اصلاحات تے مجموعی معاشی ترقی کیتے ساری وزارتاں دی آپسی ہم آہنگی تے وفاقی تے صوبائی حکومتاں دا آپسی تعاون کلیدی اہمیت دا حامل اے۔ خمیس کوں وزیراعظم آفس دے میڈیا ونگ توں جاری بیان موجب اے ڳالھیں انہاں نویں سال دے پہلے ݙینہہ معیشت نال متعلقہ تمام وزارتاں اچ جاری انتظامی تے معاشی اصلاحات، سرمایہ کاری اچ ودھارے اتے مجوزہ ترقیاتی منصوبیاں تے پیشرفت دے متعلق جائزہ اجلاس دی صدارت کریندیں ہوئیں کیتی۔ اجلاس اچ نائب وزیراعظم تے وزیر خارجہ محمد اسحاق ڈار، وفاقی وزیر منصوبہ بندی تے ترقی احسن اقبال، وفاقی وزیر اطلاعات تے نشریات عطاء اللہ تارڑ، وفاقی وزیر پٹرولیم علی پرویز ملک، وفاقی وزیر اقتصادی امور احد خان چیمہ، وزیراعظم دے مشیر رانا ثناء اللہ، وزیراعظم دے معاون خصوصی ہارون اختر، سارے صوبیاں دے چیف سیکٹریز، نیشنل کوآرڈینیٹر ایس آئی ایف سی تے ٻئے متعلقہ سرکاری حکام شرکت کیتی۔ وزیراعظم معیشت نال متعلقہ ساری وزارتاں دے عملی اقدامات تے گھٹ توں گھٹ دورانیے تے مشتمل جامع حکمتِ عملی تے سفارشات طلب کر گھدین۔ ایں موقع تے مختلف وزارتاں ولوں وزیراعظم کوں جاری ترقیاتی منصوبیاں تے معاشی، ادارہ جاتی تے انتظامی اصلاحات تے جاری کم دی پیشرفت دا ݙسیا ڳئیا۔ وزیراعظم ہدایت کیتی جو حکومت ولوں پیش کردہ اقتصادی اصلاحات تے مبنی معاشی گورننس دی پالیسی تے ساری وزارتاں ولوں موثر عمل درآمد ضروری اے۔ وزیر اعظم ہدایت کیتی جو ساری وزارتاں آپݨے شعبیاں نال متعلقہ ٻاہرلے تے اندرونی سرمایہ کاری تے ترقیاتی منصوبیاں کیتے سفارشات جلدی توں جلدی بݨاوݨ۔ وزیراعظم ٻاہرلے تے ملکی سرمایہ کاراں کوں ٻئی سہولیات ݙیوݨ کیتے سفارشات وی طلب کر گھدیاں اتے ہدایت کیتی جو سرمایہ کاری اچ اضافے کیتے برآمدات دے شعبے دی ترویج کوں خصوصی اہمیت ݙتی ونڄے۔ انھاں آکھیا جو ٻاہرلے سرمایہ کاری اچ اضافے کیتے متعلقہ وزارتاں پوری دنیا اچ پاکستانی سفارتخانیاں دے ذریعے ٻاہرلے سرمایہ کاراں دی سہولت کیتے موثر تعاون کرن۔ وزیر اعظم آکھیا جو وزارتاں سرمایہ کاری اچ اضافے کیتے صنعتی پیداوار، زراعت تے ٻئے سارے اہم شعبیاں تے ہک جیہی توجہ ݙیوݨ۔