بلوچستان پاکستان دے روشن مستقبل، علاقائی رابطہ کاری تے قومی سلامتی اچ کلیدی کردار رکھیندے، صوبے دے نینگراں کوں تعلیم، ہنر تے موقع ݙیوݨ پائیدار امن دی ضمانت اے، چیئرمین سینیٹ دا نیشنل ورکشاپ بلوچستان دے شرکا نال خطاب

اسلام آباد۔ 2 جنوری (اے پی پی) چیئرمین سینیٹ سید یوسف رضا گیلانی بلوچستان دے عوام کیتے امن، ترقی، شمولیت تے آئینی حقوق دے حوالے نال ریاست دے غیر متزلزل عزم دا اعادہ کریندیں ہوئیں آکھیے اے جو صوبے دی اہمیت محض جغرافیے تئیں محدود کائنی، رقبے دے لحاظ نال پاکستان دا سب توں وݙا صوبہ ہووݨ دے ناطے بلوچستان علاقائی روابط اچ کلیدی حیثیت رکھیندے اتے اے جنوبی ایشیا کوں وسطی ایشیا تے مشرقِ وسطیٰ نال جوڑیندے۔ چیئرمین سینیٹ اے ڳالھیں جمعہ کوں ایوانِ صدر اچ نیشنل ورکشاپ بلوچستان دے شرکا نال خطاب کریندیں ہوئیں کیتی۔ انھاں آکھیا جو بلوچستان پاکستان دے روشن مستقبل، علاقائی رابطہ کاری تے قومی سلامتی اچ کلیدی کردار رکھیندے، بلوچستان دے نینگراں کوں تعلیم، ہنر تے موقع ݙیوݨ پائیدار امن دی ضمانت اے، وفاقی اداریاں اچ بلوچستان دے نینگراں دی نمائندگی ودھاوݨ قومی ترجیح رہی اے، ریکوڈک، سی پیک تے ایس آئی ایف سی بلوچستان دی معاشی ترقی کیتے امید افزا منصوبے ہن۔ چیئرمین سینیٹ آکھیا جو بلوچستان دی اہمیت محض جغرافیہ تئیں محدود کائنی، ایندے وسائل تے ساحلی پٹی قومی معیشت دی بنیاد ہن۔ انھاں آکھیا جو “آغازِ حقوق بلوچستان پیکج” وفاق تے صوبے وچال اعتماد دی بحالی دا تاریخی قدم ہئی۔ چیئرمین سینیٹ آکھیا جو معدنی وسائل توں متاثرہ علاقیاں دی مقامی آبادی کوں ترقی دے ثمرات ݙیوݨ ضروری اے، بلوچستان کوں موسمیاتی تبدیلیاں تے قدرتی آفات دے سنگین چیلنجز درپیش ہن، سیلاب تے شدید بارشاں توں متاثرہ علاقیاں دی بحالی کیتے طویل المدتی منصوبہ بندی ضروری اے۔ وفاقی دارالحکومت اسلام آباد اچ شرکا کوں خوش آمدید آکھدے ہوئیں چیئرمین سینیٹ بلوچستان توں تعلق رکھݨ آلے مختلف تعلیمی اداریاں دے اساتذہ تے طلباء دے گروپ نال ملاقات تے مسرت دا اظہار کیتا۔ انھاں نیشنل ورکشاپ بلوچستان کوں حکومتِ بلوچستان دا ہک قابلِ تحسین تے مسلسل جاری رہݨ آلا قدم قرار ݙتا جیڑھا 12 کور ہیڈکوارٹرز کوئٹہ دے اشتراک نال کیتا ڳیا جیندے مقصد قومی ہم آہنگی، باخبر قیادت تے صوبے تے ایندے عوام توں براہِ راست متعلقہ امور تے تعمیری مکالمے کوں فروغ ݙیوݨ اے۔  انھاں چھیکڑ تے امید کیتی جو اے ورکشاپ انھاں کوں پارلیمانی جمہوریت دی بہتر سمجھ ݙیسی اتے قومی ترقی اچ تعمیری کردار ادا کرݨ دی ترغیب فراہم کریسی۔ چیئرمین سینیٹ ایں موقع تے شرکا دے پارلیمان دے کم، قانون سازی تے ٻئے قومی امور بارے مختلف سوالاں دے تفصیلی جواب وی ݙتے۔