اسلام آباد وچ 6 جنوری کوں ٹیلی میڈیسن پراجیکٹ دا باقاعدہ آغاز تھیسی، سید مصطفیٰ کمال

اسلام آباد۔ 2 جنوری (اے پی پی) وفاقی وزیر صحت سید مصطفیٰ کمال آکھیے جو ٹیلی میڈیسن سسٹم شعبہ صحت وچ خاموش انقلاب اے، اسلام آباد وچ 6 جنوری کوں ٹیلی میڈیسن پراجیکٹ دا باقاعدہ آغاز تھیسی۔ اتھاں جاری اپݨے بیان وچ انھاں آکھیا جو اساݙے نجی تے سرکاری ہسپتالاں وچ سیاسی جلسیں وانڳوں ہجوم اے، ہسپتالاں وچ ہجوم دی وجہ پرائمری تے سیکنڈری ہیلتھ کیئر سسٹم دی غیر موجودگی اے۔ انھاں آکھیا جو پرائمری ہیلتھ سسٹم دا متبادل ٹیلی میڈیسن سسٹم اے، ٹیلی میڈیسن سسٹم وفاقی بنیادی صحت مراکز وچ شروع کیتا ویندا پئے، ایم او یو دے تحت “صحت کہانی” ادارہ ڈیجیٹل صحت سہولتاں ݙیسی۔انھاں آکھیا جو وݙے ہسپتالاں دے 70 فیصد مریضاں کوں بنیادی صحت مراکز ونڄݨا چاہیدے، اساں اسلام آباد دے 6 تے کراچی دے 4 جہیں تے ٹیلی میڈیسن سسٹم نصب کریسوں، مریضاں کوں آن لائن کیمرے تے 3 جنرل فزیشن ہکے ویلھے ݙیکھدے پئے ہوسن، 6 جہیں تے 18 ڈاکٹر آن لائن موجود ہوسن، آن لائن دوا دی پرچی جاری تھیسی، مریض کوں اتھاؤں ای دوا ݙتی ویسی، وݙے ہسپتالاں دا رش گھٹ تھیوݨ شروع تھی ویسی۔ انھاں آکھیا جو ڈاکٹرز دی ہک وݙی تعداد، بالخصوص لیڈی ڈاکٹرز، پریکٹس کائنی کریندیاں، او گھر بیٹھے مریضاں دا علاج کریسن، چھی مہینے پہلے اساں اے خواب ݙٹھا ہئی، اے مینھ دا پہلا قطرہ اے، 6 جنوری کوں پہلے بی ایچ یو دا افتتاح کیتا ویسی، ایندے بعد ہر ہفتے ہک بی ایچ یو دا افتتاح تھیسی۔