وفاقی کابینہ وݙے سپیکٹرم آکشن فریم ورک دی منظوری ݙے ݙتی، فائیو جی سروسز چھی مہینے دے اندرشروع کر ݙتی ویسی ، شزہ فاطمہ خواجہ

اسلام آباد۔ 2 جنوری (اے پی پی) وفاقی وزیرانفارمیشن ٹیکنالوجی و ٹیلی کمیونیکیشن شزہ فاطمہ خواجہ آکھیے جو ملک اچ انٹرنیٹ دی رفتار دے مسئلے ہن تے ایندی بنیادی وجہ دستیاب سپیکٹرم دی سخت کمی اے، وفاقی کابینہ وݙے سپیکٹرم آکشن دے فریم ورک دی منظوری ݙے ݙتی اے، فائیو جی (5G) سروسز چھی مہینے دے اندر اسلام آباد سودھے صوبائی دارالحکومتاں وچ شروع کر ݙتیاں ویسن، قابلِ اعتماد انٹرنیٹ دے بغیر اڄ دی دنیا وچ ترقی ممکن کائنی، پاکستان ایں ویلھے دنیا دی چوتھی وݙی فری لانسنگ معیشت اے جݙاں جو آئی ٹی سیکٹر سالانہ تقریباً 20 توں 21 فیصد دی شرح نال ترقی کریندا پئے۔پریس کانفرنس نال خطاب کریندے وفاقی وزیر آکھیا جو پاکستان ایں ویلھے تقریباً 24 کروڑ آبادی کیتے موبائل انٹرنیٹ دا پورا نیٹ ورک صرف 274 میگا ہرٹز سپیکٹرم تے چلایا ویندا پئے جیڑھا ایویں اے جیویں چار لین آلی ٹریفک کوں ݙو لین دی سڑک تے چلایا ونڄے۔ انھاں آکھیا جو ایہا بنیادی وجہ اے جیں پاروں انٹرنیٹ دی رفتار سست اے، خطے وچ پاکستان کنے سپیکٹرم دی دستیابی دی سطح ٻہوں تھولی اے۔ تقابلی جائزہ ݙیندے انھاں آکھیا جو گھٹ آبادی دے باوجود بنگلہ دیش کنے تقریباً 600 میگا ہرٹز سپیکٹرم دستیاب اے۔شزہ فاطمہ ݙسایا جو وفاقی کابینہ وݙے سپیکٹرم آکشن دے فریم ورک دی منظوری ݙے ݙتی اے جیندے تحت ٹیلی کام آپریٹرز کوں تقریباً 600 میگا ہرٹز اضافی سپیکٹرم ݙتا ویسی، اے نیلامی آوݨ آلے کجھ ہفتے اچ متوقع ہے۔ انھاں آکھیا جو ایں نیلامی وچ ست سپیکٹرم بینڈز شامل ہوسن جنھاں وچوں پنج پہلی وار پاکستان وچ نیلام کیتے ویندے پئن۔ ایں توسیع دے نتیجے وچ نیلامی دے ترائے توں چار مہینے دے اندر تھری جی تے فور جی سروسز وچ نمایاں بہتری آسی جݙاں جو فائیو جی سروسز چھی مہینے دے اندر اسلام آباد سودھے صوبائی دارالحکومتاں وچ شروع کرݙتیاں ویسن۔ انھاں آکھیا جو اساݙا مقصد صرف تکھے انٹرنیٹ کائنی بلکہ مستقبل دے تقاضیں نال ہم آہنگ کنیکٹوٹی اے، پی ٹی اے بین الاقوامی کنسلٹنٹس دے نال رل تے بہترین عالمی طریقہ کار اپناوݨ کیتے کم کریندی پئی اے۔وفاقی وزیر زور ݙتا جو انٹرنیٹ کنیکٹوٹی ہݨ کوئی عیش و عشرت کائنی بلکہ معاشی ترقی، قومی سلامتی، تعلیم، صحت، زراعت تے برآمدات کیتے بنیادی انفراسٹرکچر بݨ چکی اے۔ انھاں آکھیا جو قابلِ اعتماد انٹرنیٹ دے بغیر اڄ دی دنیا وچ ترقی ممکن کائنی۔ انھاں وزیراعظم تے وزارتِ خزانہ کوں ٹیلی کام سیکٹر وچ اصلاحات دی حمایت دا کریڈٹ ݙیندے آکھیا جو رائٹ آف وے چارجز دے خاتمے نال لاڳت گھٹ تھئی اے تے فائبر انفراسٹرکچر وچ سرمایہ کاری کوں ودھارا ملئے۔ وفاقی وزیر اے وی اعلان کیتا جو کابینہ موبائل ورچوئل نیٹ ورک آپریٹر (MVNO) پالیسی دی منظوری ݙے ݙتی اے جیندے نال نویں موبائل برانڈز کیتے بغیر اپݨا نیٹ ورک بݨائے مارکیٹ وچ داخلے دا رستہ صاف تھی ڳئے۔ایندے نال مسابقت ودھسی تے صارفین کیتے قیمتاں گھٹ تھیوݨ دا امکان اے۔ہک ٻئی وݙی پیش رفت دا ذکر کریندے شزہ فاطمہ آکھیا جو پی ٹی اے ضلعی سطح دے آئی ایس پی (ISP) لائسنسز دی منظوری ݙے ݙتی اے جیندے تحت مقامی کیبل آپریٹرز تے چھوٹی کمپنیاں دیہاتاں تے قصبیں وچ قانونی طور تے انٹرنیٹ سروس ݙے سڳسن۔ وفاقی وزیر بین الاقوامی انٹرنیٹ کنیکٹوٹی وچ بہتری تے وی روشنی پاتی تے ݙسایا جو پاکستان دنیا دے ساریں توں لمبے سب میرین کیبل سسٹم (SMW6) دا حصہ بݨ چکئے جیندے نال بین الاقوامی کیبل کٹس پاروں رکاوٹاں گھٹ تھی ویسن۔ انٹرنیٹ پابندیاں دے سوال تے انھاں واضح کیتا جو عارضی بندش دا فیصلہ وزارتِ داخلہ دی سکیورٹی ہدایات تے کیتا ویندے۔ شزہ فاطمہ امید ظاہر کیتی جو سپیکٹرم نیلامی دے بعد صارفین توں ترائے توں چار مہینے وچ انٹرنیٹ دے معیار وچ واضح بہتری محسوس کریسن۔ انھاں اصلاحات کوں پاکستان دے ڈیجیٹل مستقبل کیتے انقلابی قرار ݙتا۔