وفاقی کابینہ دا اجلاس، خسارے وچ چلݨ آلے ریاستی اداریں دی نجکاری اصلاحاتی ویژن دا حصہ اے، پی آئی اے دی نجکاری اہم سنگِ میل اے، وزیراعظم شہباز شریف

اسلام آباد۔ 2 جنوری (اے پی پی) وزیراعظم محمد شہباز شریف آکھیے اے جو خسارے وچ ونڄݨ آلے ریاستی ملکیتی اداریں دی نجکاری حکومت دے معاشی اصلاحات دے ویژن دا حصہ اے۔ اساں ملک کوں ڈیفالٹ دے کنڈے توں کڈھ تے معاشی استحکام تئیں گھن آیوں۔ انھاں اڄوکےمالی سال دی پہلی سہ ماہی وچ ملک دی جی ڈی پی (GDP) وچ خاطر خواہ ودھارے کوں خوش آئند قرار ݙتا۔اسلام آباد وچ وفاقی کابینہ دے اجلاس دی صدارت کریندے وزیراعظم وفاقی کابینہ دے ارکان کوں نویں سال دی مبارخ ݙتی تے نیک خواہشات دا اظہار کیتا۔ وزیراعظم ایں ڳالھ تے اطمینان دا اظہار کیتا جو پی آئی اے دے 75 فیصد شیئرز دی نجکاری ٻہوں کامیابی نال طے پاتی اے تے بڈنگ دا عمل ٻہوں شفاف ریہا۔ انھاں آکھیا جو اساں حکومت وچ آندے ای اے عزم کیتا ہئی جو خسارے دا شکار ریاستی ملکیتی اداریں دی نجکاری کیتی ویسی۔ پی آئی اے دی نجکاری ایں حوالے نال ہک ٻہوں اہم سنگِ میل اے۔وزیراعظم متحدہ عرب امارات دے صدر شیخ محمد بن زاید آل نہیان نال اپݨی اڄوکی ملاقاتاں دا ذکر کریندے انھاں کوں ݙوطرفہ تعلقات تے سانجھی مشاورت دے تناظر وچ ٻہوں مفید قرار ݙتا۔ وزیراعظم مزید آکھیا جو ہک ݙینھ پہلے انھاں دی سعودی عرب دے ولی عہد تے وزیراعظم شہزادہ محمد بن سلمان نال ٹیلیفون تے خوشگوار ڳالھ مہاڑ تھئی جیندے وچ ݙوہیں ملکاں وچال معاشی تے سٹریٹجک تعلقات دی رفتار تے اطمینان دا اظہار کیتا ڳئے۔ وزیراعظم آکھیا جو تعلقات کوں مزید وسیع کرݨ دے حوالے نال وی ڳالھ تھئی۔اجلاس وچ کابینہ کمیٹی برائے لیجسلیٹیو کیسز دے 3 دسمبر تے 30 دسمبر 2025 دے اجلاس وچ کیتے ڳئے فیصلیں دی توثیق کیتی ڳئی، جیندے وچ اسلام آباد کیپیٹل ٹیریٹری لوکل گورنمنٹ (ترمیمی) آرڈیننس 2025 دے حوالے نال کارروائی دی توثیق وی شامل اے۔ وفاقی کابینہ اقتصادی رابطہ کمیٹی دے 26 اگست 2025 دے اجلاس وچ کیتے ڳئے فیصلیں دی وی توثیق کیتی جیندے وچ آف گرڈ (کیپٹو پاور پلانٹ) لیوی دے حوالے نال بجلی دی تقسیم کار کمپنیاں دے صارفین کوں ریلیف ݙیوݨ تے ایں حوالے نال حکمتِ عملی ترتیب ݙیوݨ دے فیصلے دی توثیق وی شامل اے۔ وفاقی کابینہ پٹرولیم ڈویژن دی سفارش تے تھرڈ پارٹی دی طرفوں آف دی گرڈ کیپٹو پاور پلانٹس کوں گیس ویچݨ دے حوالے نال آف گرڈ (کیپٹو پاور پلانٹس) لیوی ایکٹ 2025 وچ ترمیم دے صدارتی حکم نامے دے اجراء کیتے کارروائی دی وی منظوری ݙے ݙتی