پاکستان ایئر فورس دا مقامی طور تے تیار کیتے ڳئے “تیمور ویپن سسٹم” دا کامیاب تجربہ

اسلام آباد۔ 3 جنوری (اے پی پی) پاکستان ایئر فورس مقامی طور تے تیار کیتے ڳئے “تیمور ویپن سسٹم” دا کامیاب تجربہ کیتے، جیڑھا قومی ایرو سپیس تے دفاعی صلاحیتاں دی ترقی وچ ہک ٻیا اہم سنگِ میل اے۔ فوج دے محکمہ تعلقاتِ عامہ (آئی ایس پی آر) توں جاری پریس ریلیز موجب تیمور ایئر لانچڈ کروز میزائل دشمن دے زمینی تے بحری اہداف کوں 600 کلومیٹر دی رینج تے انتہائی درستی دے نال نشانہ بݨاوݨ دی صلاحیت رکھیندے تے اے روایتی وار ہیڈ چاوݨ دے قابل اے۔جدید ترین نیویگیشن تے گائیڈنس سسٹم نال لیس تیمور کوں ٻہوں گھٹ اُچائی تے پرواز کرݨ کیتے ڈیزائن کیتا ڳئے جیڑھا اینکوں دشمن دے فضائی تے میزائل دفاعی نظام توں موثر طور تے بچاوݨ دے قابل بݨیندے۔ ایندی درستگی نال حملہ کرݨ دی صلاحیت پاکستان ایئر فورس دی روایتی روک تھام تے آپریشنل لچک کوں نمایاں طور تے ودھیندی اے جیڑھی ملک دی مجموعی دفاعی پوزیشن کوں مزید تکڑا بݨیندی اے۔ آئی ایس پی آر موجب کامیاب فلائٹ ٹیسٹ پاکستان دی دفاعی صنعت دی تکنیکی پختگی، جدت تے خود انحصاری دی عکاسی کریندے۔لانچ دے موقع تے پاکستان مسلح افواج دے سینئر افسراں دے علاوہ ممتاز سائنسداناں تے انجینئرز وی شرکت کیتی، جنھاں ایں جدید ویپن سسٹم دی تیاری وچ اہم کردار ادا کیتا۔ ایئر چیف مارشل ظہیر احمد بابر سدھو (این آئی ایم، ایچ جے، چیف آف دی ایئر سٹاف) ایں شاندار کامیابی تے سائنسداناں، انجینئرز تے پاک فضائیہ دی پوری ٹیم کوں دلوں مبارخ ݙتی اے۔ انھاں دی پیشہ ورانہ مہارت، لگن تے پاکستان دی دفاعی صلاحیتاں کوں مضبوط بݨاوݨ کیتے غیر متزلزل عزم دی تعریف کیتی۔ایئر چیف آکھیا جو ایجھیاں کامیابیاں قوم دے ٹیکنالوجیکل خود کفالت حاصل کرݨ تے بدلدے ہوئے علاقائی سکیورٹی ماحول وچ معتبر روایتی روک تھام برقرار رکھݨ دے عزم دی گواہی ہن۔ تیمور ویپن سسٹم دا کامیاب ٹیسٹ پاکستان ایئر فورس دی آپریشنل تیاری، ٹیکنالوجیکل برتری تے قومی سلامتی دے مقصد دی عکاسی کریندے۔