وزیراعظم شہباز شریف دا عالمی یومِ بریل تے پیغام

اسلام آباد۔ 4 جنوری (اے پی پی) وزیراعظم محمد شہباز شریف بصارت توں محروم لوکاں سودھے سارے خصوصی افراد دے حقوق دے تحفظ، ہکو سویں موقع ݙیوݨ تے مساوی معاشرے دی تشکیل کیتے عزم دا اظہار کریندے آکھیے جو پاکستان وچ بصارت توں محروم لوکاں مختلف شعبیں حتیٰ کہ مسابقتی امتحان وچ وی کامیابی دے بعد ٻہوں جانفشانی نال کم کریندے پئن۔ انھاں اے ڳالھ عالمی یومِ بریل دے موقع تے اپݨے پیغام وچ آکھی۔وزیراعظم دفتر دے میڈیا ونگ توں جاری بیان موجب وزیراعظم آکھیا جو او ایں ݙینھ دی مناسبت نال پاکستان تے پوری دنیا دے بصارت توں محروم افراد کیتے خیر سگالی دے جذبات دا اظہار کریندن، لوئی بریل دے انقلابی لمسی تحریری نظام دنیا بھر وچ لکھاں بصارت توں محروم افراد کیتے تعلیم، معلومات تئیں رسائی تے باوقار زندگی دے موقع پیدا کیتے۔ ایں نظام دی گہری اہمیت کوں بجا طور تے تسلیم کریندے اقوامِ متحدہ دی جنرل اسمبلی 2018 وچ 4 جنوری کوں عالمی یومِ بریل قرار ݙتا۔وزیراعظم آکھیا جو پاکستان وچ بصارت توں محروم افراد دا بریل کوں اپنیندے ہوئے مختلف شعبیں وچ نمایاں خدمات سر انجام ݙیوݨ ایں ڳالھ دا ثبوت اے جو صلاحیت تے اعلیٰ کارکردگی ہر اوکھ کوں پار کریندے اپݨا رستہ بݨیندی اے۔ انھاں آکھیا جو حکومتِ پاکستان بصارت توں محروم افراد سودھے سارے خصوصی افراد دے حقوق دے تحفظ، ہکو سویں موقع ݙیوݨ، مساوی معاشرے دی تشکیل کیتے پرعزم اے۔ انھاں ایں سلسلے وچ صائمہ سلیم دی مثال ݙتی جیڑھی وزارتِ خارجہ دی افسر دی حیثیت نال پاکستان دے اقوامِ متحدہ مشن وچ نمایاں طور تے اپݨے فرائض سر انجام ݙیندی پئی اے۔ وزیر اعظم آکھیا جو بے شک ایجھی کامیابیاں استقامت، اہلیت تے قومی وقار دی روشن مثالاں ہن۔ انھاں یاد ݙوایا جو پاکستان اقوامِ متحدہ دے کنونشن برائے حقوقِ خصوصی افراد (UNCRPD) دا رکن اے تے معلومات تئیں رسائی کوں یقینی بݨاوݨ کیتے پاکستان 2023 وچ مراکش معاہدے دی وی توثیق کیتی۔ وزیراعظم بصارت توں محروم افراد دے حقوق کیتے حکومت دے علاوہ تعلیمی اداریں، سول سوسائٹی، نجی شعبے تے میڈیا توں اپیل کیتی جو او اپݨے تعاون کوں مزید مضبوط کرن۔ انھاں دعوت ݙتی جو آؤ بحیثیت قوم ایں عزم دی تجدید کروں جو کوئی وی شہری اپݨی صلاحیتاں کوں ورتݨ کیتے موقع دی فراہمی وچ پچھوں نہ رہ ونڄے