امریکی آئل کمپنیاں وینزویلا وچ ارباں ڈالر دی سرمایہ کاری کریسن، ڈونلڈ ٹرمپ

واشنگٹن۔ 4 جنوری (اے پی پی) امریکی صدر ڈونلڈ ٹرمپ وینزویلا دے صدر نکولس مادورو کوں ہک فوجی حملے دے دوران گرفتار کر ڳھدے ونڄݨ دے بعد اعلان کیتے جو امریکا دی آئل کمپنیاں وینزویلا پڄ تے ارباں ڈالر دی سرمایہ کاری کرݨ کیتے تیاری کر چکن تاں جو جنوبی امریکا دے ایں ملک وچ تیل دی پیداوار بحال کرݨ کیتے اپݨے وسائل ورتن۔ العربیہ موجب امریکی صدر ڈونلڈ ٹرمپ ہک بیان وچ آکھیے جو امریکی آئل کمپنیاں وینزویلا وچ اتنی زیادہ سرمایہ کاری کریسن جتنی دنیا وچ کہیں ٻئی جاہ تے کائناں کیتی ڳئی ہوسی، ارباں ڈالر تیل دی پیداواری رقم تے ٻہوں بری طرح برباد کیتے ڳئے انفراسٹرکچر تے خرچ کیتے ویسن، ایں سرمایہ کاری دے ذریعے کمپنیاں ملک کیتے دولت کماوݨ دا بندوبست کریسن۔ ایں ویلھے وینزویلا وچ صرف شیوران ناں دی امریکی کمپنی کم کریندی پئی اے۔خبر رساں ادارے “رائٹرز” کوں اے پی آئی دے ترجمان ݙسایا جو اساں ساری پیشرفت بشمول عالمی منڈی وچ تیل دی ترسیل دے امور کوں وی نیڑے توں ݙہدے پئے ہیسے۔ ݙوجھے پاسے شیوران آکھیے جو ایندی نگاہ اپݨے اثاثیں دے تحفظ تے کارکناں دی سلامتی تے ہے۔ یاد رہے شیوران وینزویلا توں ہر روز 150,000 تیل خلیجی ساحل تے برآمد کریندی اے۔ تیل متعلق تجزیہ کاراں آکھیے جو وݙی امریکی تیل کمپنیاں کوں وینزویلا وچ داخل کرݨ دے ٹرمپ دے منصوبے دے رستے وچ بنیادی ڈھانچے دا وینزویلا وچ محدود ہووݨ رکاوٹ بݨ سڳدے، انفراسٹرکچر کوں بہتر بݨاوݨ وچ کئی سال تے ٻہوں وݙی سرمایہ کاری چاہیدی ہوسی۔ ماہرین موجب وینزویلا وچ تیل دی صنعت توں فیدہ چاوݨ کیتے کئی ارب ڈالر دی ضرورت ہوسی۔ گلوبل ہیڈ آف سیکٹر اینالسٹس تھرڈ برج پیٹر میکنیلی ایں بارے ڳالھ کریندے مزید آکھیا جو ایں سارے کم وچ ݙاہ سال لڳ سڳدن۔ اتھاں صدر ٹرمپ آکھیا جو وینزویلا دے سارے تیل تے امریکی پابندی برقرار رہسی۔ ڈونلڈ ٹرمپ میڈیا نال ڳالھ کریندے اے وی آکھیا جو جݙاں تئیں وینزویلا وچ امریکی مطالبات تے اہداف پورے کائنی تھی ویندے، امریکی فوجی دستے وینزویلا وچ رہسن تے امریکا اپݨے اطمینان تئیں سارے فوجی آپشنز کوں وی اپݨے سامݨے رکھیسی۔