مسئلہ کشمیر تقسیمِ پاک و ہند دا نامکمل ایجنڈا اے، سردار ایاز صادق

اسلام آباد۔ 4 جنوری (اے پی پی) سپیکر قومی اسمبلی سردار ایاز صادق آکھیے جو کشمیری عوام کوں انھاں دا بنیادی تے ناقابلِ تنسیخ حقِ خودارادیت ݙیوݨ عالمی برادری دی اخلاقی تے قانونی ذمہ واری اے، مسئلہ کشمیر برصغیر دی تقسیم دا نامکمل ایجنڈا اے جیندے منصفانہ حل اقوامِ متحدہ دی سلامتی کونسل دی قرارداداں موجب ناگزیر اے۔ یومِ حقِ خودارادیتِ کشمیر دے موقع تے اپݨے پیغام وچ سپیکر قومی اسمبلی آکھیا جو کشمیری عوام گزریل ست ݙھاکیں توں اقوامِ متحدہ دی قرارداداں دی روشنی وچ اپݨے حق دے حصول کیتے جدوجہد کریندے پئن پر انھاں کوں حالی تئیں انصاف نی مل سڳیا۔انھاں آکھیا جو 5 جنوری 1949 کوں اقوامِ متحدہ دی سلامتی کونسل ہک تاریخی قرارداد منظور کیتی، جیندے تحت جموں و کشمیر دے عوام کوں استصوابِ رائے دے ذریعے اپݨے مستقبل دا فیصلہ کرݨ دا حق ݙتا ڳیا، پر بدقسمتی نال اڄ تئیں ایں قرارداد تے عملدرآمد کائنی تھی سڳیا۔ سردار ایاز صادق آکھیا جو بھارت دی طرفوں گزریل ست ݙھاکیں توں مقبوضہ جموں و کشمیر وچ اقوامِ متحدہ دی قرارداداں دی مسلسل خلاف ورزیاں عالمی برادری دے ضمیر کیتے ہک وݙا امتحان ہن۔ انھاں آکھیا جو مقبوضہ جموں و کشمیر وچ بھارتی قابض افواج دی طرفوں انسانی حقوق دی سنگین تے منظم پامالیاں بدستور جاری ہن، جنھاں وچ ماورائے عدالت قتل، جبری گرفتاریاں، بنیادی انسانی آزادیاں تے قدغناں تے آبادی دے تناسب کوں تبدیل کرݨ دی مذموم کوششاں شامل ہن، جیڑھے بین الاقوامی قوانین تے انسانی اقدار دی صریح خلاف ورزی ہن۔ انھاں ایں عزم دا اعادہ کیتا جو پاکستان کشمیری عوام دی منصفانہ جدوجہد دی اخلاقی، سیاسی تے سفارتی حمایت جاری رکھیسی تے عالمی و علاقائی فورمز تے کشمیری عوام دی آواز بݨ تے انھاں دے حقِ خودارادیت کیتے موثر کردار ادا کریندا رہسی۔ڈپٹی سپیکر قومی اسمبلی سید غلام مصطفیٰ شاہ وی یومِ حقِ خودارادیتِ کشمیر دے موقع تے اپݨے پیغام وچ آکھیا جو کشمیری عوام دی جدوجہدِ آزادی بے مثال قربانیاں، استقلال تے حوصلے دی روشن مثال اے، جینکوں عالمی سطح تے تسلیم کیتے ونڄݨ دی اشد ضرورت اے۔ انھاں آکھیا جو مسئلہ کشمیر دا اقوامِ متحدہ دی قرارداداں دے مطابق منصفانہ حل جنوبی ایشیا وچ پائیدار امن تے استحکام کیتے ضروری اے۔ ڈپٹی سپیکر آکھیا جو پاکستان دی پارلیمان کشمیری عوام دے نال مکمل یکجہتی دا اظہار کریندی اے تے انھاں دے سیاسی، سفارتی تے اخلاقی حقوق دے تحفظ کیتے اپݨا بھرپور کردار ادا کرݨ دے عزم تے قائم اے۔ انھاں کشمیری عوام کیتے آزادی، امن تے خوشحال مستقبل کیتے اپݨی نیک تمناواں دا اظہار کیتا۔