وزیرِ داخلہ محسن نقوی دا ایف آئی اے کراچی زون دا دورہ

کراچی۔ 4 جنوری (اے پی پی) وفاقی وزیرِ داخلہ محسن نقوی ایف آئی اے کراچی زون دا دورہ کیتا تے خصوصی اجلاس دی صدارت کیتی، انھاں ایف آئی اے کراچی زون تے ساؤتھ زون دی کارکردگی دا جائزہ ڳھدا۔ وزارتِ داخلہ توں جاری بیان موجب وزیرِداخلہ محسن نقوی منی لانڈرنگ وچ ملوث مافیا دے خلاف بھرپور کریک ڈاؤن دا حکم ݙیندے آکھیا جو وݙے منی لانڈرز تے مضبوط ہتھ پاتا ونڄے، منی لانڈرنگ وچ ملوث عناصر دی پوری منی ٹریل کوں بے نقاب کیتا ونڄے، حوالہ تے ہنڈی دا کاروبار کہیں صورت برداشت کائنی، بلا امتیاز ایکشن نظر آوݨا چاہیدے۔وزیرِ داخلہ محسن نقوی انسانی سمگلنگ وچ ملوث ایجنٹس مافیا دے خلاف وی موثر کارروائی دا حکم ݙتا۔ وزیرِ داخلہ محسن نقوی آکھیا جو نشوم لوکاں کوں ملازمت دا جھانسا ݙے تے ٻاہرلے ملکاں بھجواوݨ آلے عناصر کہیں رعایت دے مستحق کائنی، بغیر دٻاؤ ایجنٹس مافیا دے خلاف کارروائی کیتی ونڄے۔ انھاں آکھیا جو نقلی دوائیں دا کاروبار کرݨ آلے انسانی زندگیاں نال کھیݙدے پئن، ایجھے مکروہ دھندے وچ ملوث عناصر کوں قانون دی گرفت وچ گھن آیا ونڄے۔ وزیرِ داخلہ محسن نقوی آکھیا جو ایف آئی اے کراچی زون وچ انسانی وسائل دی کمی کوں ترجیحی بنیاداں تے پورا کیتا ویسی، ایف آئی اے افسران کوں سارے ضروری وسائل ݙتے ویسن پر انھاں کوں کارکردگی نال ادارے دی نیک نامی وچ اضافہ کرݨا اے۔ بریفنگ وچ ݙسایا ڳیا جو 4 مہینے وچ انسانی سمگلنگ وچ ملوث 20 ایجنٹس کوں گرفتار کیتا ڳیا تے 140 ملین روپے دی نان کسٹم مصنوعات تے منشیات کوں ضبط کیتا ڳئے۔ مسافراں دی سہولت کیتے کراچی ایئرپورٹ تے سہولت سنٹر قائم کر ݙتا ڳئے۔ وزیرِ داخلہ محسن نقوی انچارج افسراں توں انھاں دے متعلقہ سرکلز دی کارکردگی رپورٹ منڳی تے مزید محنت نال کم کرݨ دی ہدایت کیتی۔