وینزویلا اچ 30 ݙینہہ دے اندر انتخابات کائنا تھیسن، امریکی صدر

واشنگٹن۔ 6 جنوری (اے پی پی) امریکی صدر ڈونلڈ ٹرمپ آکھیے جو وینزویلا اچ آوݨ آلے 30 ݙینہہ دے دوران کوئی انتخاب کائنا کرایا ویسی کیونجو ملک دی صورتحال ایندے کیتے موزوں کائنی۔ شنہوا دے مطابق انھاں ہک انٹرویو دے دوران آکھیا جو اساکوں پہلے ملک کوں ٹھیک کرݨا پوسی۔ ایں حالت اچ انتخابات ممکن کائنی، عوام ووٹ پاوݨ دے قابل ای کائنی۔ صدر ٹرمپ آکھیا جو امریکی انتظامیہ وینزویلا دے توانائی دے شعبے دی بحالی کیتے امریکی تیل کمپنیاں کوں سبسڈی فراہم کر سڳدی اے۔ انھاں دا آکھݨ ہئی جو توانائی دے بنیادی ڈھانچے دی تعمیرِ نو 18 مہینے توں گھٹ عرصے اچ مکمل کیتی ونڄ سڳدی اے، تاہم ایندے تے بھاری لاگت آسی۔ انھاں واضح کیتا جو امریکا وینزویلا دے نال جنگ اچ کائنی۔ صدر ٹرمپ دے مطابق، “اساں منشیات فروشاں دے خلاف جنگ لڑدے پئیوں اتے انھاں عناصر دے خلاف کارروائی کریندے پئیوں جیڑھے جرائم تے بدامنی کوں فروغ ݙیندن۔ اے بیان ایجھے ویلھے سامݨے آیا جݙاں ݙو ݙینہہ پہلے وینزویلا دے صدر نکولس مادورو کوں امریکی افواج دارالحکومت کراکس توں حراست اچ گھن تے چلی ڳئیاں ہن۔ صدر ٹرمپ دے مطابق امریکی مداخلت دی نگرانی وزیرِ خارجہ مارکو روبیو، وزیرِ دفاع پیٹ ہیگستھ، وائٹ ہاؤس دے نائب چیف آف سٹاف سٹیفن ملر تے نائب صدر جے ڈی وینس کریسن۔