ٹیلی میڈیسن سسٹم شعبہ صحت اچ خاموش انقلاب اے، ٹیلی میڈیسن سسٹم وفاقی بنیادی صحت مراکز اچ شروع کر ݙتے، وفاقی وزیر سید مصطفٰی کمال

اسلام آباد۔ 6 جنوری (اے پی پی) وفاقی وزیرِ صحت سید مصطفٰی کمال آکھیے جو ٹیلی میڈیسن سسٹم شعبہ صحت وچ ہک خاموش انقلاب اے، پرائمری ہیلتھ سسٹم دا متبادل ٹیلی میڈیسن سسٹم اے، ٹیلی میڈیسن سسٹم وفاقی بنیادی صحت مراکز (BHUs) اچ شروع کر ݙتے۔ اے ڳالھیں انھاں وزارتِ صحت دے تعاون نال “صحت کہانی” دے زیرِ اہتمام پہلے ہیلتھ کیئر سینٹر دی افتتاحی تقریب دے موقع تے کیتا۔ انھاں آکھیا جو اج ٹیلی میڈیسن دے حوالے نال ٻہوں وݙا ݙینہہ اے، اسلام آباد دے گوگینہ گائوں اچ ٹیلی میڈیسن پراجیکٹ دا باقاعدہ آغاز تھی ڳئے۔ انھاں آکھیا جو “صحت کہانی” ادارہ ڈیجیٹل صحت سہولیات فراہم کریسی۔ انھاں آکھیا جو اساݙے نجی تے سرکاری ہسپتالاں اچ سیاسی جلسیاں وانگوں ہجوم ہوندے۔ ہسپتالاں اچ ہجوم دی وجہ پرائمری تے سیکنڈری ہیلتھ کیئر سسٹم دی غیر موجودگی اے۔ انھاں آکھیا جو پرائمری ہیلتھ سسٹم دا متبادل ٹیلی میڈیسن سسٹم اے۔ انھاں آکھیا جو وݙے ہسپتالاں دے 70 فیصد مریض بنیادی صحت مراکز ونڄݨے چاہیدن۔ اساں اسلام آباد دے 6 تے کراچی دے 4 مقامات تے ٹیلی میڈیسن سسٹم لیندے پئیوں مريضاں کوں آن لائن کیمرے تے 3 جنرل فزیشن ہکے ویلھے ݙیکھدے پئے ہوسن۔انھاں آکھیا جو 6 جہیں تے 18 ڈاکٹر آن لائن موجود ہوسن، آن لائن دوا دی پرچی جاری تھیسی، مریض کوں اتھوں ای دوا فراہم کیتی ویسی، وݙے ہسپتالاں دا رش گھٹ تھیوݨ شروع تھی ویسی۔ انھاں آکھیا جو ڈاکٹرز دی ہک وݙی تعداد خاص طور تے تریمت ڈاکٹرز پریکٹس کائنی کریندیاں، او گھر ٻیٹھے مریضاں دا علاج کریسن، کجھ مہینے پہلے اساں اے خواب ݙٹھا ہئی، اے مینہہ دا پہلا قطرہ اے۔ منگل کوں پہلے بی ایچ یو (BHU) دا افتتاح کیتے، ایندے بعد ہر ہفتے ہک بی ایچ یو دا افتتاح تھیسی۔ اتھاں سویل توں شام چھی وجے تئیں مریضاں دا معائنہ کیتا ویسی۔ انھاں آکھیا جو میں اتھاں اچانک دورے (سرپرائز وزٹ) کریندا رہساں۔