مالیاتی نظام کوں مضبوط بݨاوݨ کیتے نویں ٹیکنالوجیز دے جائزے کیتے معتبر بین الاقوامی شراکت داراں نال فعال طور تے رابطے اچ ہیسے، وزیرِ خزانہ محمد اورنگزیب دی سجوانی گروپ دے وفد نال ملاقات اچ ڳالھ مہاڑ

اسلام آباد۔ 7 جنوری (اے پی پی) وفاقی وزیرِ خزانہ اتے محصولات سینیٹر محمد اورنگزیب آکھیے جو پاکستان آپݨے مالیاتی نظام کوں مضبوط بݨاوݨ کیتے نویں ٹیکنالوجیز دے جائزے کیتے معتبر بین الاقوامی شراکت داراں نال فعال طور تے رابطے اچ اے۔ انھاں اے ڳالھ ٻدھ دے ݙینہہ اتھاں سجوانی بزنس گروپ دے وفد نال ملاقات اچ آکھی۔ ملاقات اچ ڈیجیٹل فنانس تے ابھردی ہوئی ٹیکنالوجیز اچ تعاون دے امکانات تے ڳالھ مہاڑ تھئی۔ اعلیٰ سطح دے وفد دی قیادت چیئرمین “ون گروپ” سید ذیشان شاہ کریندے پئن۔ ملاقات اچ ٹوکنائزیشن، مصنوعی ذہانت (AI)، بلاک چین اتے ڈیجیٹل انفراسٹرکچر نال متعلق عالمی سطح تے ابھردے ہوئے رجحانات تے غور کیتا ڳیا۔ ملاقات اچ پاکستان دے مالیاتی شعبے اچ جاری اصلاحات تے ڈیجیٹل تبدیلی دے ایجنڈے دی حمایت کیتے ممکنہ تعاون دے پہلواں تے وی ڳالھ مہاڑ تھئی۔ وفد حکومتِ پاکستان دے نال شراکت داری اچ گہری دلچسپی دا اظہار کیتا اتے حقیقی اثاثیاں دی ٹوکنائزیشن، بلاک چین تے مبنی پلیٹ فارمز، مصنوعی ذہانت تے مبنی حل تے جدید ڈیجیٹل انفراسٹرکچر سویں شعبیاں اچ تکنیکی مہارت، مشاورتی مدد تے استعداد کار اچ اضافے دی پیشکش کیتی۔ وفد عالمی سطح دی بہترین مثالاں تے نجی شعبے دی اختراعات کوں اجاگر کیتا جیڑھیاں ملک دے قانونی تے ضابطہ جاتی فریم ورک دے مکمل احترام کوں یقینی بݨیندیں ہوئیں پاکستان کوں شفافیت، کارکردگی، سرمایہ کاراں دی رسائی تے مالی شمولیت اچ بہتری گھن آوݨ اچ مدد ݙے سڳدیاں ہن۔ وزیرِ خزانہ وفد دی دلچسپی کوں سراہیا تے انھاں دا شکریہ ادا کیتا۔ انھاں آکھیا جو کہیں وی ممکنہ تعاون دی بنیاد قومی ترجیحات، شفافیت تے لاگو قوانین تے پالیسیاں تے رکھی ویسی۔ وفد چ امیرہ حسین سجوانی، عاقب حسن، الپ اوزینالپ تے جوزف ال آم وی شامل ہن۔