وفاقی وزیرِ داخلہ محسن نقوی دی بیجنگ اچ چینی ہم منصب نال ملاقات، ݙوپاسہ تعلقات اتے انسدادِ دہشت گردی متعلق سانجھے اقدامات تے ڳالھ مہاڑ

بیجنگ۔ 7 جنوری (اے پی پی) وفاقی وزیرِ داخلہ محسن نقوی ٻدھ دے ݙینہہ بیجنگ اچ چین دے وزیرِ داخلہ وانگ ژاو ہونگ نال اہم ملاقات کیتی۔ چین دی وزارتِ پبلک سکیورٹی دے ہیڈ کوارٹر پڄݨ تے چینی وزیرِ داخلہ وانگ ژاو ہونگ وفد دے رَلے پاکستانی ہم منصب محسن نقوی دا پُرتپاک خیر مقدم کیتا۔ ساݙھے ترائے گھنٹے لمبی ایں ملاقات اچ پاک چین ݙوپاسہ تعلقات اتے انسدادِ دہشت گردی متعلق سانجھے اقدامات تے ڳالھ مہاڑ تھئی۔ انسدادِ دہشت گردی، پولیس ٹریننگ ایکسچینج پروگرام تے مشترکہ مفادات دے شعبیاں اچ اشتراک ودھاوݨ تے تفصیلی ڳالھ تھئی۔ ملاقات اچ مشترکہ ورکنگ گروپ دی ہر 3 مہینے بعد میٹنگ تے اتفاق کیتا ڳیا جڈانجو وزرائے داخلہ دی سطح تے ہر سال ہک واری ملاقات تھیسی۔ ݙوہیں وزرائے داخلہ ݙوپاسہ تعاون کوں ودھاوݨ کیتے کوآرڈینیشن بہتر بݨاوݨ دی ضرورت تے زور ݙتا۔ چینی وزیرِ داخلہ چینی شہریاں تے منصوبیاں دی حفاظت کیتے کیتے ڳئے اقدامات تے اطمینان دا اظہار کیتا اتے وزیرِ داخلہ محسن نقوی تے انھاں دی ٹیم دا شکریہ ادا کیتا۔ چینی وزیرِ داخلہ انسدادِ دہشت گردی تے داخلی سکیورٹی متعلق پاکستان دی کوششاں کوں سراہیا۔ انھاں آکھیا جو دہشت گردی دے خلاف جنگ اچ پاکستان دی قربانیاں کوں قدر دی نگاہ نال ݙیکھدوں۔ ݙوہیں رہنماواں دہشت گردی تے جرائم دے خلاف مشترکہ تے فوری ردِ عمل دے نظام کوں موثر بݨاوݨ تے اتفاق کیتا اتے پولیس دی استعداد ودھاوݨ کیتے ٹریننگ ایکسچینج پروگرام دا دائرہ کار ودھاوݨ تے وی اتفاق تھیا۔ ملاقات اچ اسلام آباد تے بیجنگ کوں “سسٹر سٹیز” بݨاوݨ دے معاملیاں تے وی ڳالھ تھئی۔ وفاقی وزیرِ داخلہ محسن نقوی آکھیا جو چینی شہریاں تے مشترکہ مفادات دے منصوبیاں دا تحفظ اساݙی پہلی ترجیح اے، اسلام آباد اچ انھاں دی حفاظت کیتے ہک خاص پروٹیکشن یونٹ بݨیندے پئے ہیسے، اتے سائبر کرائمز دی روک تھام کیتے چینی تعاون دا خیر مقدم کریسوں۔ انھاں آکھیا جو پاکستان تے چین دے درمیان پکا رشتہ اے تے کوئی ایندے اچ دراڑ کائنی پا سڳدا۔ محسن نقوی چینی ہم منصب کوں پاکستان آوݨ دی دعوت ݙتی تے صدر آصف علی زرداری تے وزیراعظم شہباز شریف ولوں نیک خواہشات دا سنیھا پڄایا۔ چینی وزیرِ داخلہ محسن نقوی کوں ستمبر اچ چین اچ تھیوݨ آلے “گلوبل سکیورٹی تعاون فورم” اچ شرکت دی دعوت ݙتی۔