وفاقی وزیر داخلہ محسن نقوی دا بیجنگ پبلک سکیورٹی پاسپورٹ بیورو دا دورہ، چینی امیگریشن سسٹم دا معائنہ کیتا

بیجنگ۔ 8 جنوری (اے پی پی) وفاقی وزیر داخلہ محسن نقوی بیجنگ پبلک سکیورٹی دے پاسپورٹ بیورو تے ایگزٹ انٹری ایڈمنسٹریشن بیورو دا دورہ کیتا، بیورو پڄݨ تے ڈائریکٹر جنرل سن یو وزیر داخلہ دا پُرتپاک استقبال کیتا۔ وفاقی سیکرٹری داخلہ خرم آغا، ڈی جی نیشنل پولیس اکیڈمی، آئی جی اتے چیف کمشنر اسلام آباد وی انھاں دے نال ہن۔ وزیر داخلہ بیورو دے مختلف سیکشنز دا مشاہدہ کیتا اتے چین دے پاسپورٹ بݨاوݨ تے امیگریشن دے جدید ترین نظام دا تفصیلی جائزہ گھدا۔ بریفنگ اچ ݙسایا ڳیا جو چین اچ “ون ونڈو” سہولت دے تحت پاسپورٹ تے امیگریشن دا عمل ٻہوں تیز رفتار اے۔ آن لائن درخواست دے بعد شہریاں کوں صرف 24 گھنٹیاں اچ پاسپورٹ فراہم کر ݙتا ویندے، عوام دی سہولت کیتے بیورو ہفتے دے 7 ݙینہہ تے 24 گھنٹے فعال رہندے اتے ڈیجیٹل ٹریکنگ دے ذریعے درخواست گزاراں کوں ہر مرحلے دی بروقت آگاہی ملدی اے۔ وزیر داخلہ محسن نقوی چینی نظام دی تعریف کریندیں ہوئیں آکھیا جو پاکستان اچ وی پاسپورٹ تے امیگریشن سسٹم کوں جدید، تیز رفتار تے فول پروف بݨایا ویندا پئے۔ انھاں آکھیا جو جعلسازی دے خاتمے کیتے پاکستانی پاسپورٹ اچ نویں سکیورٹی فیچرز متعارف کرائے ویسن۔