وزارتاں دی کارکردگی رپورٹ دا مقصد خود احتسابی دے نظام کوں مضبوط بݨاوݨ تے وزراء کوں انھاں دی ذمہ واریاں دا پابند بݨاوݨ اے، وفاقی وزیر پارلیمانی امور ڈاکٹر طارق فضل چوہدری دی پریس کانفرنس

اسلام آباد۔ 8 جنوری (اے پی پی) وفاقی وزیر پارلیمانی امور ڈاکٹر طارق فضل چوہدری آکھیے جو حکومت ساریاں وزارتاں دی کارکردگی دے ذریعے گورننس دے ماڈل کوں بہتر توں بہتر کرݨ چاہندی اے۔ وزارت پارلیمانی امور دی ہک سالہ کارکردگی رپورٹ وزیراعظم محمد شہباز شریف کوں بھیجی ویسی۔ وزارتاں دی کارکردگی رپورٹ دا مقصد خود احتسابی دے نظام کوں مضبوط بݨاوݨ تے وزراء کوں انھاں دی ذمہ واریاں دا پابند بݨاوݨ اے۔ وزارت پارلیمانی امور دا کردار صرف شکایتاں تے مسئلیں دے حل تئیں محدود کائنی بلکہ اے سیاسی تے عوامی نمائندگی دے موثر ذریعے وی فراہم کریندی اے۔ حکومت ہر قسم دے مذاکرات کیتے تیار اے کیوں جو کہیں وی مسئلے دا پائیدار حل ڳالھ مہاڑ تے ڈائیلاگ دے ذریعے ہی ممکن اے۔ پریس کانفرنس توں خطاب کریندے انھاں آکھیا جو جنوری توں دسمبر 2025ء تئیں دی رپورٹ وزیراعظم شہباز شریف دی ہدایت تے پیش کیتی ویسی اتے میڈیا دے ذریعے عوام کوں وی پیش کیتی ویسی۔ اساݙا مقصد اے جو وزارتاں دی کارکردگی دے ذریعے حکومت گورننس دے ماڈل کوں زیادہ توں زیادہ بہتر بݨاوݨ چاہندی اے۔ انھاں آکھیا جو ملک وچ سرمایہ کاری، پاور سیکٹر، میری ٹائم افیئرز، مائنز اینڈ منرلز، خارجہ امور سودھے موسمیاتی تبدیلیاں دے حوالے نال درپیش چیلنجز نال نبٹݨ وچ کارکردگی بہتر نظر آندی پئی اے۔انھاں آکھیا جو حکومت جو کجھ کریندی پئی اے ایں حوالے نال قوم کوں آگاہ کرݨ ٻہوں ضروری اے۔ سارے وزراء کوں وزیراعظم پابند کیتے جو ہک سال وچ انھاں دیاں وزارتاں جیڑھے ہدف مقرر کیتن ایں بارے قوم کوں ݙسیا ونڄے۔ وزارت پارلیمانی امور اتحادی جماعتاں نال مضبوط رابطہ قائم کررکھئے تے انھاں دیاں تجویزاں تے تحفظات سِدھے وزیراعظم تئیں پڄائے ویندن۔