وزیر داخلہ محسن نقوی دی صدارت اجلاس، انسانی سمگلنگ تے بھکاری مافیا دے خلاف کریک ڈاؤن دا حکم، ایئرپورٹس تے سکریننگ سخت کرݨ دی ہدایت

اسلام آباد۔ 9 جنوری (اے پی پی) وفاقی وزیر داخلہ محسن نقوی غیر قانونی امیگریشن اچ ملوث عناصر تے پیشہ ور بھکاری مافیا دے خلاف سخت ترین کارروائی دا حکم ݙیندیں ہوئیں آکھیے جو انسانی سمگلنگ اچ ملوث عناصر کہیں رعایت دے مستحق کائنی، پاکستان دے ناں تے حرف آوݨ دی اجازت ہرگز نہ ݙتی ویسی۔ وفاقی وزیر داخلہ محسن نقوی دی صدارت ہک اہم اجلاس تھیا جیندے اچ ایف آئی اے (FIA) دے امیگریشن ونگ دی کارکردگی تے انسانی سمگلنگ دی روک تھام کیتے جاری مہم دا تفصیلی جائزہ گھدا ڳیا۔ اجلاس اچ وفاقی سیکرٹری داخلہ، ڈی جی ایف آئی اے تے کراچی تے لاہور دے ڈائریکٹرز سودھے ٻئے اعلیٰ حکام شریک تھئے۔ وزیر داخلہ غیر قانونی امیگریشن اچ ملوث مافیا دے خلاف بلا امتیاز تے سخت کارروائی جاری رکھݨ دے احکامات جاری کیتے۔ انھاں واضح کیتا جو انسانی سمگلرز ملک دی بدنامی دا باعث بݨدے پئن، جنھاں کوں قانون دے شکنجے اچ گھن آوݨ ٻہوں ضروری اے۔ اجلاس اچ ٻاہرلے ملک ونڄݨ آلے پیشہ ور بھکاریاں تے انھاں دی پشت پناہی کرݨ آلے گروہاں دے خلاف موثر کارروائی دا فیصلہ کیتا ڳیا۔ محسن نقوی ہدایت کیتی جو بھکاری مافیا دے خلاف گھیرا تنگ کیتا ونڄے۔ وزیر داخلہ ایف آئی اے کوں امیگریشن قوانین تے موثر عملدرآمد یقینی بݨاوݨ دی ہدایت کیتی۔ انھاں آکھیا جو سارے ایئرپورٹس تے سفری دستاویزات دی سخت سکریننگ کیتی ونڄے اتے چیکنگ دے نظام کوں ٻیا جدید تے موثر بݨایا ونڄے۔ وزیر داخلہ ایں عزم دا اظہار کیتا جو امیگریشن دے نظام اچ شفافیت تے بہتری گھن آوݨ کیتے سارے ضروری اقدامات چاتے ویسن تانجو غیر قانونی سرگرمیاں دا مکمل خاتمہ تھی سڳے۔