ضمنی الیکشن حلقہ پی پی 167 لاہور-22، پوسٹل بیلٹ دے ذریعے ووٹ پاوݨ دے خواہشمند اپݨیاں درخواستاں 20 جنوری 2026 تئیں جمع کرا سڳدن، الیکشن کمیشن

اسلام آباد۔ 9 جنوری (اے پی پی) الیکشن کمیشن آف پاکستان اعلان کیتے جو ضمنی الیکشن حلقہ پی پی 167 لاہور-22 وچ پوسٹل بیلٹ دے ذریعے ووٹ پاوݨ دے خواہشمند لوک اپݨیاں درخواستاں 20 جنوری 2026 تئیں جمع کراسڳدن۔ الیکشن کمیشن توں جاری اعلامیہ موجب پوسٹل بیلٹ دی سہولت سرکاری ملازمین، آرمی افسراں تے جواناں اتے انھاں دے اہلخانہ دے علاوہ نادرا دے معذوری کارڈ رکھݨ آلے معذور لوکاں کیتے وی دستیاب اے۔ الیکشن کمیشن واضح کیتے جو پوسٹل بیلٹ دی درخواست متعلقہ ریٹرننگ افسر ݙے جمع کراوݨی ہوسی اتے درخواست دا متعلقہ دفتر یا محکمے توں تصدیق شدہ ہووݨ ضروری اے۔ پوسٹل بیلٹ فارم الیکشن کمیشن دی ویب سائٹ توں ڈاؤن لوڈ کیتا ونڄ سڳدے، البتہ پوسٹل بیلٹ حاصل کرݨ آلے ووٹر پولنگ سٹیشن تے ووٹ پاوݨ دے مجاز نہ ہوسن۔