خیبرپختونخوا دے عوام دے مسئلیں دا چنڳی طرح پتہ اے، وفاقی حکومت اپݨے دائرہ اختیار دے اندر انھاں دے پائیدار حل کیتے سنجیدہ اقدامات کریندی پئی اے، وزیراعظم محمد شہباز شریف

اسلام آباد۔ 10 جنوری (اے پی پی) وزیراعظم محمد شہباز شریف آکھیے جو خیبر پختونخوا دے عوام دے مسئلیں دا چنڳی طرح پتہ اے تے وفاقی حکومت اپݨے دائرہ اختیار دے اندر انھاں مسئلیں دے پائیدار حل کیتے سنجیدہ اقدامات کریندی پئی اے۔ وزیراعظم دفتر میڈیا ونگ توں جاری بیان موجب وزیراعظم محمد شہباز شریف نال خیبر پختونخوا توں تعلق رکھݨ آلے عوامی نمائندیں اتھاں ملاقات کیتی جیندے وچ صوبے دی مجموعی سیاسی صورتحال تے عوام کوں درپیش مسئلیں بارے تفصیلی ڳالھ مہاڑ تھئی۔وزیراعظم آکھیا جو خیبر پختونخوا وچ جاری وفاقی ترقیاتی منصوبیں دی وقتی تکمیل تے عوامی مسئلیں دا حل وفاقی حکومت دی ترجیحات وچ شامل اے۔ شرکاء وزیراعظم کوں ݙسایا جو خیبر پختونخوا دی حکومت مکمل طور تے ناکام تھی چکی اے، گورننس ناں دی کوئی چیز کائنی، صحت، تعلیم تے انفراسٹرکچر دے حوالے نال صوبائی حکومت کنے کوئی واضح پالیسی کائنی۔ وزیراعظم عوامی نمائندیں تے زور ݙتا جو او عوامی مسئلیں دے حل کوں اولین ترجیح بݨاون۔ انھاں آکھیا جو نوجواناں کیتے میرٹ تے لیپ ٹاپ ݙیوݨ دی پالیسی جاری رہسی۔ وزیراعظم خیبر پختونخوا وچ وفاق دے زیرِاہتمام ترقیاتی منصوبیں کیتے احسن اقبال دی سربراہی وچ کمیٹی بݨا ݙتی اے جیڑھی پشاور دا دورہ کرتے پیش رفت دا جائزہ گھنسی۔ ملاقات اچ نائب وزیراعظم و وزیر خارجہ اسحاق ڈار، وفاقی وزیر اطلاعات  و نشریات عطاللہ تارڑ، وزیر قانون اعظم نذیر تارڑ، وزیر پارلیمانی امور طارق فضل چودھری، وزیراعظم دے مشیر رانا ثناء اللہ ، کیپٹن ریٹائرڈ صفدر، بابر نواز ایم این اے، ثمر بلور ایم این اے، اختیار ولی (کوآرڈینیٹر وزیراعظم)، مرتضیٰ جاوید عباسی سابق ڈپٹی سپیکر، زاہد خان سابق سینیٹر، ڈاکٹر عباداللہ ایم پی اے، پیر صابر شاہ، سردار مشتاق سابق ایم این اے، شاہ جی گل آفریدی سابق ایم این اے، شہاب الدین خان  رحمت سلام خٹک اتے بہرہ مند تنگی  وی موجود ہن۔