پاکستان دی معیشت محفوظ ہتھاں وچ اے، دنیا دے مالیاتی ادارے پاکستانی معیشت دے معترف ہن، عطاء اللہ تارڑ

لاہور۔ 10 جنوری (اے پی پی) وفاقی وزیراطلاعات و نشریات عطاء اللہ تارڑ آکھیے جو پاکستان دی معیشت محفوظ ہتھاں وچ اے، میکرو اکنامک اشاریے بہتر تھیندے پئن، پوری دنیا دے مالیاتی ادارے پاکستانی معیشت دے معترف ہن۔جامعہ اشرفیہ وچ مولانا فضل الرحیم دے انتقال تے تعزیت دے بعد وزیر داخلہ محسن نقوی دے رلے میڈیا نال ڳالھ مہاڑ کریندے وفاقی وزیر اطلاعات آکھیا جو مولانا فضل الرحیم دے درجات دی بلندی کیتے دعا گو ہیسے، انھاں دی دینی خدمات ہمیشہ یاد رکھیاں ویسن۔ انھاں آکھیا جو مولانا فضل الرحیم ہمیشہ شفقت نال پیش آوݨ دا معاملہ فرمایا تے جامعہ اشرفیہ وچ ٻالاں دی ݙیکھ بھال کیتے جدید نظام متعارف کرایا۔ ہک سوال دے جواب وچ انھاں آکھیا جو پاکستان ڈیفالٹ دے کنڈے توں واپس آ چکئے تے اڄ دنیا دے مالیاتی ادارے پاکستان دی معیشت دی تعریف کریندے پئن۔ انھاں آکھیا جو سٹاک مارکیٹ ݙینھ و ݙٰنھ ریکارڈ بݨیندی پئی اے، صرف دسمبر وچ ٻاہرلے ملک رہݨ آلے پاکستانیاں 3.6 ارب ڈالر وطن بھیڄن جیڑھا پچھلے سال دے مقابلے وچ 17 فیصد زیادہ اے۔ انھاں آکھیا جو مہانگ وچ نمایاں کمی تھئی اے تے وزیراعظم شہباز شریف دی قیادت وچ معیشت مضبوط ہتھاں وچ اے۔