اسلام آباد دے سیکٹرجی سیون ٹو وچ گیس سلنڈر دھماکے نال گھوٹ، کنوار سودھے 8 بندے جان دی بازی ہرڳئن

اسلام آباد۔ 11 جنوری(اے پی پی) وفاقی دارالحکومت اسلام آباد دے سیکٹر جی سیون 2 وچ گیس سلنڈر دھماکے نال گھوٹ ، کنوارسودھے 8 بندے جان دی بازی ہرڳئن جݙاں جو 11 لوک زخمی تھئن، امدادی ٹیماں علاقے وچ وݙے پیمانے تے آپریشن مکمل کر ڳھدے۔آئی سی ٹی پولیس دے ترجمان اتوار کوں اے پی پی کوں ݙسایا جو دھماکہ گھر دے اندر تھیا جتھاں شادی دیاں تقریباں جاری ہن۔ دھماکے پاروں چھت ڈھہہ ڳئی تے گھٹ توں گھٹ چار نال آلے مکاناں کوں وی ضیان پُڄے۔ ملبے تلے دٻیے سارے لوکاں کوں ٻاہر کڈھ ڳھدا ڳئے۔ پولیس موجب مرݨ آلیں اچ اسلم مسیح دی اہلیہ جوراں بی بی، شکیل، شیری حنیف (گھوٹ)، مہک (کنوار)، نعیم تے وسیم دی شناخت تھی سڳی اے۔ پولیس تصدیق کیتی جو ایں المناک واقعے وچ نویں پرنیجے جوڑے سودھے ہکے خاندان دے کئی بندے فوت تھئن۔ زخمیاں کوں پمز، پولی کلینک تے برن سینٹر منتقل کیتا ڳئے۔ ڈی آئی جی اسلام آباد محمد جواد طارق امدادی کارروائیاں دی نگرانی کریندے پئن۔ ترجمان ݙسایا جو ابتدائی طور تے پتہ لڳے جو گیس لیکج پاروں اے دھماکہ تھیا۔ پولیس شہریاں توں اپیل کیتی اے جو او موسمِ سرما وچ گیس سیفٹی پروٹوکول تے عمل کرن۔