پاک بحریہ دے کئی بحری جہازاں تے مشتمل فلوٹیلا دا ٻاہرلے ملک تعیناتی دے دوران عمان دا دورہ

اسلام آباد۔ 11 جنوری (اے پی پی) پاک بحریہ دے جہازاں راہ ناورد (سیل شپ)، مددگار تے پاکستان میری ٹائم سیکیورٹی ایجنسی (پی ایم ایس اے) دے جہاز پی ایم ایس ایس کشمیر تے مشتمل فلوٹیلا مسقط، عمان دی بندرگاہ سلطان قابوس دا دورہ کیتا۔ بندرگاہ پڄݨ تے عمانی حکام ولوں جہازاں دا پرتپاک استقبال کیتا ڳیا۔پاکستان نیوی توں جاری بیان موجب دورے دے دوران مشن کمانڈر کموڈور عامر اقبال عمان دی بحری قیادت نال ملاقاتاں کیتیاں۔ مشن کمانڈر رائل نیوی آف عمان دے قائم مقام کمانڈر، ڈی جی آپریشنز، کمانڈر میری ٹائم سیکیورٹی سینٹر تے ٻئے حکام نال ملاقاتاں کیتیاں جنھاں وچ بحری افواج وچال رابطے تے سیکیورٹی تعاون تے ڳالھ مہاڑ تھئی۔ عمانی افسراں جہازاں دا دورہ وی کیتا۔ بندرگاہ تے قیام دے دوران عمانی حکام تے پاکستان سکول مسقط دے ٻالاں دی وݙی تعداد جہاز ݙٹھے۔ دورے دے بعد پاک بحریہ تے رائل نیوی آف عمان دے جہاز “خصب” دے درمیان بحری مشق وی تھئی۔ پاکستان تے عمان سمندری ہمسائے ہن تے اے دورہ ݙوہیں افواج دے تعلقات مزید تکڑے کریسی۔