خلیجی ملکاں وچ پاکستانی افرادی قوت دی کھپت کیتے اقدامات تکھے کیتے ونڄن ، وزیراعظم شہباز شریف

اسلام آباد۔ 12 جنوری (اے پی پی) وزیراعظم محمد شہباز شریف پاکستانی افرادی قوت کوں عالمی سطح تے مقابلے کیتے بین الاقوامی سرٹیفیکیشنز ݙیوݨ کوں خوش آئند قرار ݙیندے خلیجی ملکاں وچ پاکستانی افرادی قوت دی کھپت کیتے وزارتِ خارجہ تے وزارتِ سمندر پار پاکستانیاں کوں اقدامات تکھے کرݨ دی ہدایت کیتی اے۔ وزیراعظم دفتر توں جاری بیان موجب وزیراعظم دی صدارت وچ پیشہ ورانہ تربیت دے نویں متعارف کرائے ڳئے ایکوسسٹم تے جائزہ اجلاس تھیا جیندے وچ نیوٹیک (NAVTTC) دے تحت جاری پروگراماں دا تفصیلی جائزہ ڳھدا ڳیا۔ وزیراعظم نیوٹیک دی کارکردگی تے اطمینان دا اظہار کریندے تکنیکی تربیت دے نویں اہداف مقرر کرݨ تے اپرینٹس شپ قانون تے عملدرآمد یقینی بݨاوݨ دی ہدایت کیتی۔ انھاں آکھیا جو پاکستانی نوجوان افرادی قوت صلاحیتاں نال مالامال اے، انھاں کوں کم وچ گھن آوݨ کیتے ہک مفصل پروگرام شروع کیتا ڳئے۔وزیراعظم نیوٹیک دے سارے پارٹنر اداریں وچ طلباء تے استاداں کیتے بائیومیٹرک حاضری دا نظام لاگو کرݨ دی ہدایت کیتی۔ انھاں آکھیا جو عالمی سطح تے جنھاں ہنر دی زیادہ منڳ اے، انھاں وچ نینگراں کوں تربیت ݙیوݨ ساݙی پہلی ترجیح اے۔ اجلاس کوں ݙسایا ڳیا جو پچھلے سال نیوٹیک دے ذریعے 1 لکھ 46 ہزار لوکاں تربیت حاصل کیتی جݙاں جو 15 ہزار توں ودھ لوکاں کوں عالمی سرٹیفیکیشنز ݙتی ڳئی۔ تکامل دے ذریعے 3 لکھ توں ودھ لوکاں تربیت ڳھدی جݙاں جو 2 لکھ 80 ہزار توں ودھ لوک سعودی عرب وچ ایں نظام دے ذریعے روزگار نال لڳے۔ وزیراعظم نیوٹیک کوں مستقبل کیتے مزید بہتری دے نویں اہداف مقرر کرݨ دی ہدایت کیتی۔