سہیل آفریدی اڄ افغانستان دے ترجمان دے طور تے ڳالھ کریندے پئن جیڑھی ٻہوں قابلِ مذمت تے شرمناک اے، عطاء اللہ تارڑ

اسلام آباد۔ 12 جنوری (اے پی پی) وفاقی وزیرِاطلاعات و نشریات عطاء اللہ تارڑ آکھیے جو وزیراعلیٰ خیبرپختونخوا سہیل آفریدی اڄ افغانستان دے ترجمان دے طور تے ڳالھ کریندے پئن جیڑھی ٻہوں قابلِ مذمت تے شرمناک اے۔ سماجی رابطے دے پلیٹ فارم “ایکس” تے اپݨی ہک پوسٹ وچ وزیراعلیٰ خیبرپختونخوا سہیل آفریدی دے بیان تے ردِعمل دا اظہار کریندے وفاقی وزیرِ اطلاعات آکھیا جو پوری دنیا افغان طالبان رجیم ولوں دہشت گرداں دی پشت پناہی دے ثبوت ݙٹھن تے افغانستان دی زمین دے دہشت گردی دی کارروائیاں کیتے استعمال تھیوݨ دے ناقابلِ تردید شواہد وی موجود ہن۔ انھاں آکھیا جو سہیل آفریدی کوڑ تے منافقت دی انتہا کر ݙتی اے۔عطاء اللہ تارڑ آکھیا جو پاکستانی قوم دہشت گرداں دا مقابلہ کریندے بے پناہ قربانیاں ݙتن۔ انھاں آکھیا جو تحریکِ انتشار آلے جݙاں وی منہ کھولیندن، دہشت گرداں دی سہولت کاری کریندن۔ انھاں آکھیا جو پاکستان دی ترقی فتنہ الخوارج کوں قبول کائنی، ایں سانڳے پاکستان کوں نشانہ بݨایا ویندے، سہیل آفریدی کوں ہوش دے ناخن گھنݨے چاہیدن۔