وزیراعظم دی اڳواݨی اچ این آئی ٹی بی دے امور بارے جائزہ اجلاس، ٹیکنالوجی دے استعمال نال شہریاں کیتے حکومتی سہولتاں تئیں رسائی ودھ سوکھی بݨاوݨ دی ہدایت

اسلام آباد۔ 12 جنوری(اے پی پی) وزیراعظم محمد شہباز شریف ٹیکنالوجی دے استعمال نال شہریاں کیتے حکومتی سہولتاں تئیں رسائی ودھ سوکھی بݨاوݨ دی ہدایت کریندے آکھیے جو حجاج کرام دی سہولت کیتے ایں سال توں حج دے سارے ضروری مرحلیاں کوں مکمل ڈیجیٹائز کیتا ونڄے۔ وزیراعظم دی صدارت اچ این آئی ٹی بی (NITB) دے امور بارے جائزہ اجلاس تھیا۔ اجلاس اچ وفاقی وزیر اقتصادی امور احد خان چیمہ، وفاقی وزیر آئی ٹی شزا فاطمہ خواجہ اتے اعلیٰ سرکاری افسران شریک تھئے۔ اجلاس اچ وزیراعظم وزارت آئی ٹی اتے ٻیاں وزارتاں ولوں اسلام آباد اچ “آسان خدمت مرکز” دے قیام کیتے تیاریاں دی تعریف کیتی۔ وزیراعظم ہدایت کیتی جو حجاج کرام کیتے حج دے مراحل ڈیجیٹائز کیتے ونڄن اتے اوورسیز پاکستانیاں کیتے کیو آر بیسڈ فیڈ بیک سسٹم دا تیکھے جائزہ ڳھدا ونڄے۔ اجلاس کوں ݙسایا ڳیا جو این آئی ٹی بی دے نویں سی ای او دی تعیناتی دے بعد ادارے دے ڈھانچے کوں نویں سرے توں ترتیب ݙتا ویندا پئے۔ اسلام آباد اچ خدمت مرکز کیتے تیاریاں مکمل ہن۔ سرکاری اداریاں کیتے ہک محفوظ نویں ایپ تیکھے جاری کیتی ویسی۔ ہسپتالاں اچ سروس دی بہتری کیتے “ون پیشنٹ ون آئی ڈی” دا نظام آخری مرحلیاں اچ اے جیندے نال مریضاں دی ݙیکھ بھال بہتر تھیسی۔ این آئی ٹی بی ایں ویلے 145 توں ودھ سرکاری ویب سائٹس تے 126 پورٹلز چلیندی پئی اے۔