سپیکر قومی اسمبلی اپوزیشن لیڈر دی نامزدگی کیتے 13 جنوری تئیں تجاویز منڳ ڳھدن، ڳݨتری 14 جنوری کوں تھیسی

اسلام آباد۔ 12 جنوری(اے پی پی) سپیکر قومی اسمبلی سردار ایاز صادق قائدِ حزبِ اختلاف (اپوزیشن لیڈر) دی نامزدگی کیتے 13 جنوری تئیں تجاویز منڳین اتے اعلان کیتے جو ایوان دی کارروائی دے رول 39 دے تحت ٻدھ کوں ݙینھ 3 وڄے ارکان دی ڳݨتری کیتی ویسی۔ معاملے تے سپیکر آکھیا جو دستخطاں دی تصدیق دے بعد جئیں رکن کوں سب توں زیادہ عددی برتری ملسی، اوکوں اپوزیشن لیڈر قرار ݙتا ویسی۔ انھاں آکھیا ڄیکر کوئی رکن شروع اچ تجویز کنندہ نا ہئی پر ڳݨتری ویلھے آ تے تجویز تے دستخط کر ݙیندے، تاں اوکوں وی ڳݨتری اچ رلایا ویسی۔ عامر ڈوگر ایوان کوں ݙسایا جو 76 ارکان ایں عہدے کیتے محمود خان اچکزئی کوں نامزد کیتے اتے انھاں ضابطے دی کارروائی پوری کرݨ کیتے منگل تئیں دا ویلھا منڳیے۔ ایندے توں پہلے سابق اپوزیشن لیڈر دی نااہلی دے بعد ایوان اچ چاتے ڳئے سوالاں تے سپیکر متعلقہ طریقہ کار پڑھ تے سݨایا۔ انھاں ݙسایا جو 19 نومبر، 5 دسمبر، 19 دسمبر تے 29 دسمبر 2025ء کوں پارلیمانی وہپ عامر ڈوگر اتے گوہر علی خان کوں خط جاری کیتے ڳئے ہن اتے ایں ڳالھ دی تصدیق کیتی ڳئی جو پشاور ہائی کورٹ توں متعلقہ کیس واپس ڳھن ڳھدے ڳئن۔