سندھ طاس معاہدے دی معطلی خطے دے امن تے پاکستان دے آبی حقوق کیتے سنگین خطرہ، بھارت دی آبی جارحیت دا مقصد اساکوں پاݨی دے بحران نال ݙوچار کرݨ اے، وفاقی وزیر پروفیسر احسن اقبال

اسلام آباد۔ 13 جنوری (اے پی پی) وفاقی وزیر برائے منصوبہ بندی ترقی تے خصوصی اقدامات پروفیسر احسن اقبال آکھیے جو بھارت ولوں سندھ طاس معاہدے دی معطلی خطے دے امن تے پاکستان دے آبی حقوق کیتے سنگین خطرہ اے، بھارتی آبی جارحیت دا مقصد پاکستان کوں پاݨی دے بحران اچ پاوݨ اے۔ ماحولیاتی تے موسمیاتی تبدیلیاں دی وجہ نال گلیشیئرز دے پگھلاؤ اچ خطرناک حد تئیں اضافہ تھئے۔ انھاں اے ڳالھ منگل کوں ٹاسک فورس برائے نیشنل واٹر سیکیورٹی دے پہلے اجلاس دی صدارت کریندیں ہوئیں کیتی۔ اجلاس اچ وزیر آبی وسائل میاں محمد معین وٹو وی شریک ہن۔ وفاقی وزیر وزارت آبی وسائل دے تحت خصوصی ورکنگ گروپ بݨاوݨ تے 51 ݙینہہ اچ قابلِ عمل سفارشات پلاننگ کمیشن کوں پیش کرݨ دی ہدایت کیتی۔ اجلاس اچ ݙسایا ڳیا جو ہندوکش تے ہمالیہ ریجن اچ برف پگھلݨ دی شرح اچ 65 فیصد ریکارڈ اضافہ تھئے تے سیاچن گلیشیئر سالانہ 50 توں 60 میٹر دی رفتار نال پگھلدا پئے۔احسن اقبال آکھیا جو پاݨی دا تحفظ ای غذائی سلامتی تے معاشی استحکام دی ضمانت اے۔ انھاں آکھیا جو واٹر سیکیورٹی صرف ہک شعبہ کائنی بلکہ ملکی بقا دی بنیاد اے۔ انھاں یونیورسٹیاں تے ماہرین کوں وی ایں منصوبے اچ شامل کرݨ دی ہدایت کیتی اتے آکھیا جو نویں ڈیم بݨاوݨ ویلھے دی اہم لوڑھ اے۔