اسلام آباد۔ 13 جنوری (اے پی پی) وفاقی وزیرِ داخلہ محسن نقوی نال ڈائریکٹر جنرل کسٹمز و پورٹ سکیورٹی احمد بن لاحج الفلاسی دی سربراہی وچ متحدہ عرب امارات (UAE) دے وفد ملاقات کیتی۔ ملاقات وچ پاک-یو اے ای تعلقات، سانجھے تعاون تے مسافراں کیتے امیگریشن عمل مزید سوکھا بݨاوݨ بارے تفصیلی ڳالھ مہاڑ کیتی ڳئی۔ ملاقات وچ ایں ڳالھ تے اتفاق کیتا ڳیا جو پاکستان تے متحدہ عرب امارات …
وفاقی وزیرِ داخلہ نال اماراتی وفد دی ملاقات، امیگریشن عمل مزید سوکھا بݨاوݨ تے ڳالھ مہاڑ
اسلام آباد۔ 13 جنوری (اے پی پی) وفاقی وزیرِ داخلہ محسن نقوی نال ڈائریکٹر جنرل کسٹمز و پورٹ سکیورٹی احمد بن لاحج الفلاسی دی سربراہی وچ متحدہ عرب امارات (UAE) دے وفد ملاقات کیتی۔ ملاقات وچ پاک-یو اے ای تعلقات، سانجھے تعاون تے مسافراں کیتے امیگریشن عمل مزید سوکھا بݨاوݨ بارے تفصیلی ڳالھ مہاڑ کیتی ڳئی۔ ملاقات وچ ایں ڳالھ تے اتفاق کیتا ڳیا جو پاکستان تے متحدہ عرب امارات دے درمیان ’’پری امیگریشن کلیئرنس‘‘ دے حوالے نال باقاعدہ معاہدہ کیتا ویسے۔ ایں نویں نظام دا آغاز شروع وچ پائلٹ بنیاداں تے کیتا ویسے جݙاں جو پائلٹ منصوبے دا آغاز کراچی توں پہلے مرحلے وچ کیتا ویسے۔وفاقی وزیرِ داخلہ محسن نقوی ایں موقع تے ڳالھ کریندے آکھیا جو پری امیگریشن کلیئرنس دے تحت مسافراں دی امیگریشن تے متعلقہ کلیئرنس پاکستان وچ ہی مکمل کیتی ویسے تے ایں نظام دے نفاذ دے بعد جݙاں مسافر متحدہ عرب امارات پڄسن تاں انھاں کوں امیگریشن دی لمبی کارروائی توں گزرݨ دی لوڑھ نہ ہوسی تے او ڈومیسٹک مسافر وانڳوں سِدھا ایئرپورٹ توں ٻاہر نکل سڳسن۔ انھاں آکھیا جو ایں اقدام نال سفر وچ سہولت، وقت دی بچت تے مسافراں کیتے مجموعی تجربہ بہتر تھیسی۔ یو اے ای وفد ایں اقدام کوں ݙوہیں ملکاں دے لوکاں کیتے مفید قرار ݙیندے تعاون دے عزم دا اظہار کیتا۔ وفد وچ اعلیٰ حکام شامل ہن، وزیرِ مملکت طلال چوہدری تے سیکرٹری داخلہ خرم آغا وی موجود ہن
