موسمیاتی تبدیلی دے باوجود دنیا ایں مسئلے تے بے حس اے، گھٹ ترقی یافتہ ملکاں تے ترقی یافتہ ملکاں دی غیر ذمہ دارانہ ترقی دا ٻوجھ پاتا ویندا پئے، وفاقی وزیر پروفیسر احسن اقبال

اسلام آباد۔ 13 جنوری (اے پی پی) وفاقی وزیر منصوبہ بندی، ترقی و خصوصی اقدامات پروفیسر احسن اقبال آکھیے جو موسمیاتی تبدیلی دے باوجود عالمی سطح تے ایں مسئلے بارے بے حسی پاتی ویندی اے، گھٹ ترقی یافتہ ملکاں تے ترقی یافتہ ملکاں دی غیر ذمہ دارانہ ترقی دا ٻوجھ پایا ویندا پئے، ترقی یافتہ ملکاں اپݨی ذمہ واریاں پوریاں کرن۔ اے ڳالھ انہاں ہک مشاورتی ورکشاپ نال خطاب کریندے آکھی۔ وفاقی وزیر آکھیا جو پاکستان موسمیاتی تبدیلی توں متاثر تھیوݨ آلے دنیا دے 10 وݙے ملکاں وچ شامل اے۔ اساݙا گرین ہاؤس گیساں وچ حصہ ہک فیصد توں وی گھٹ اے پر موسمیاتی آفات پاروں اساکوں ترقیاتی وسائل ول ول بحالی تے خرچ کرݨے پوندن۔احسن اقبال آکھیا جو 2022ء دے تباہ کن چھل نال پاکستان کوں 30 ارب ڈالر دا نقصان تھیا۔ انھاں آکھیا جو شدید گرمی دی لہر تے موسمی شدت ہݨ پاکستان کیتے ہک نواں معمول بݨ ڳئن۔ انھاں آکھیا جو عالمی مالیاتی نظام دی اصلاح دی ضرورت اے۔ وفاقی وزیر آکھیا جو اے ورکشاپ پالیسی توں عملدرآمد دی طرف ہک اہم قدم اے، پی ایس ڈی پی وچ موسمیاتی لچک کوں شامل کرݨ کیتے منصوبہ بندی دے نظام وچ اصلاحات کیتیاں ویندیاں پئن۔ انھاں آکھیا جو ماحولیات اڑان پاکستان دے فائیو ایز (5Es) دا بنیادی ستون اے