اکادمی ادبیات پاکستان اچ ” چائے باتیں اور کتابیں” محفل بدھ شام کوں سجسی، مہاندرے سرائیکی سوڄھوان ڈاکٹر محبوب تابش مہمان ہوسن

اسلام آباد۔13جنوری(اے پی پی)اکادمی ادبیات پاکستان اسلام آباد اچ ” چائے باتیں اور کتابیں” محفل بدھ شام کوں سجسی جیندے اچ مہاندرے سرائیکی سوڄھوان ڈاکٹر محبوب تابش مہمان خصوصی ہوسن۔ اے تقریب ہر ٻدھ کوں اکادمی ادبیات پاکستان اسلام آباد اچ ” چائے باتیں اور کتابیں” دے ناں توں سجائی ویندی اے جیندے اچ پورے ملک توں مختلف زباناں دیاں شاعر و ادیب شخصیات نال میل کیتا ویندے اتے انہاں دی شاعری، تصنیف اتے فن و ادب تے سوڄھلا پاتا ویندے۔ ایں ٻدھ 14 جنوری کوں شام 4 وڄے رکھی ونڄݨ آلی محفل ” چائے باتیں اور کتابیں” اچ مہمان شخصیت ملتان دے سرائیکی سوڄھوان ڈاکٹر محبوب تابش دے شعری مجموعے ” پاݨی ست کھوئیں دا” تے ڳالھ مہاڑ کیتی ویسی۔

اے کتاب سماجی سیاسی رزمیہ دے منظر نامے اچ لکھی ڳئی اے جیڑھی سرائیکی زبان دی قدیمی ثقافت، ریتی رواج، زبان دانی دی ہک نویکلی سنڄاݨ ݙکھیندی اے۔ شعری مجموعے ” پاݨی ست کھوئیں دا” دا ورقہ ورقہ اے حقیقت کھُلیندے جو سرائیکی زبان، ایندی قدامت اتے ورثہ ٻہوں دلچسپ اتے نویکلا اے ڄیڑھا ایندے وسبیاں، پرکھاں اتے زبان دا اینڄھا سوھݨا ورتارا ݙکھیندے جو تساں ایندی ہک ہک پھینگ نال اپݨی ما ٻولی نال محبت دی تریہہ ٻڄھا سڳدے او۔ سئیں محبوب تابش اپݨی سادہ کہاݨی کوں کینڄھے سوھݨے انداز اچ ورتیے!

نا کوئی قصہ کوہترا ساݙا نا اݨ مل کہاݨی

ڈھیر فتند نی کرݨے ٻدھݨے جیوݨ رمز ایاݨی

کل یگ دے اے لچھمی کھنجدی لوبھ کوں سوھݨا سئیں آں

بے انت عمیق انند اے ساکوں ست کھوئیں دا پاݨی