تعلیمی سفارت کاری بین الاقوامی رابطیاں دا ہک دیرپا تے موثر ذریعہ تھیسی، قائم مقام صدر مملکت سید یوسف رضا گیلانی دا یونیورسٹی آف لندن دے وفد تے سابق طلباء دے اعزاز اچ تھیوݨ آلے استقبالیے نال خطاب

اسلام آباد۔ 14 جنوری (اے پی پی) قائم مقام صدر مملکت سید یوسف رضا گیلانی تعلیمی سفارت کاری کوں بین الاقوامی رابطیاں دا ہک دیرپا تے موثر ذریعہ قرار ڈیندیں ہوئیں آکھیا جو ملک دے تعلیمی شعبے اچ موجود گہرے مسائل دے حل تے نینگراں کوں تزی نال بدلدی دنیا کیتے تیار کرݨ دی خاطر پائیدار تعلیمی شراکت داری ضروری اے۔ اے ڳالھیں انھاں یونیورسٹی آف لندن دے وفد تے اوندے سابق طلباء دے اعزاز اچ تھیوݨ آلے استقبالیے نال خطاب کریندیں ہوئیں کیتے۔ قائم مقام صدر آکھیا جو وفد دی موجودگی پاکستان تے برطانیہ وچال علم، امنگ تے شراکت داری دے ہک مضبوط پل دی علامت اے۔ انھاں یونیورسٹی آف لندن دے عالمی مقام تے تقریباً ݙو صدیاں توں ودھ مختلف شعبیاں اچ انسانی ترقی کیتے خدمات کوں خراجِ تحسین پیش کیتا۔ قائم مقام صدر آکھیا جو پاکستان دیاں کئی نامور شخصیات یونیورسٹی آف لندن دی فارغ التحصیل ہن جنھاں عوامی خدمت، قانون، طب، تدریس، تجارت تے سفارت کاری جیہے شعبیاں اچ نمایاں خدمات انجام ڈتن، اے مشترکہ تعلیمی ورثہ ݙو طرفہ تعلیمی تعاون دی بنیاد فراہم کریندے اتے تعلقات دے فروغ کیتے ہک مضبوط اساس اے۔ انھاں آکھیا جو یونیورسٹی دے بین الاقوامی پروگراماں تے تسلیم شدہ تدریسی مراکز ہزاراں پاکستانی طلباء کوں ملک چھوڑے بغیر عالمی معیار دی تعلیم حاصل کرݨ دا موقع فراہم کیتے، ایندے نال تعلیم کوں عام کرݨ اچ مدد ملی تے نینگراں پاکستانی آپݨے وطن اچ رہندیں ہوئیں عالمی سطح تے مقابلہ کرݨ دے قابل ٻݨٰن۔قائم مقام صدر آکھیا جو بطور وزیر اعظم تے قومی اسمبلی دے سپیکر سمیت آپݨے مختلف آئینی عہدیاں دے دوران تعلیم ہمیشہ انھاں دی ترجیحات اچ شامل رہی اے۔ انھاں یونیورسٹی آف سوات جیہے نویں اداریاں دے قیام کوں ایں عزم دی عملی مثال قرار ݙتا جو تعلیم ہی تنازعات، انتہا پسندی تے پسماندگی دا سب توں موثر جواب اے۔ قائم مقام صدر امید ظاہر کیتی جو وفد دا اے دورہ بالخصوص طلباء کیتے نویں مواقع پیدا کریسی جنھاں کوں انھاں ملک دا مستقبل قرار ݙتا۔ ایندے توں پہلے وفاقی وزیر اطلاعات و نشریات عطا اللہ تارڑ پاکستان دے نال یونیورسٹی آف لندن دے دیرینہ تعلقات تے ایندے قانون دے پروگراماں اچ پاکستان نال متعلق ماڈیولز متعارف کراوݨ کوں سراہیا۔ انھاں آکھیا جو بطور سابق طالب علم یونیورسٹی اچ حاصل کیتی گئی تعلیم انھاں دی پیشہ ورانہ صلاحیتاں تے عوامی خدمت کوں مضبوط ٻݨائے۔آپݨے استقبالیہ کلمات اچ یونیورسٹی آف لندن دے پرو وائس چانسلر پروفیسر فل آلمنڈنگر آکھیا جو پاکستان دے نال تعاون کوں ادارہ مستقبل دی تشکیل کیتے ہک دوراندیش حکمت عملی دا حصہ سمجھدے۔ انھاں آکھیا جو پاکستان اچ یونیورسٹی دا مضبوط سابق طلباء نیٹ ورک موجود اے اتے 25 ایلومنائی ایمبیسیڈر پبلک پالیسی تے گورننس اچ کردار ادا کریندے پئن۔ انھاں آکھیا جو یونیورسٹی آف لندن دا وفد ایں سال لاہور، اسلام آباد تے کراچی دا دورہ کریسی تانجو او موجودہ تے سابق طلباء نال ملاقاتاں کرے اتے حکومتی نمائندیاں نال ڳالھ مہاڑ کرے۔ انھاں پاکستان کیتے خصوصی سکالرشپ پروگرام دا وی اعلان کیتا جئیں اچ ترائے مکمل وقتی وظائف شامل ہن جڈاں جو دنیا بھر اچ 40 توں ودھ پاکستانی طلباء ایں سال یونیورسٹی آف لندن دی سکالرشپس توں مستفید تھیسن۔